“Куорат дьаһалтата буруоппус биэрэр, ону Дьокуускайдааҕы ГИБДД тутан ылар!?”, – диэн харантыын туһунан “Instagram” социальнай ситимҥэ Алдан куорат сирэйигэр суруйаллар.
Өрөспүүбүлүкэ үрдүнэн хоруона-вируһунан 26 киһи ыалдьыбыта биллэр. Олортон 13 киһи үтүөрбүт.
Кулун тутар 30 күнүттэн Дьокуускайга, Жатайга, Мииринэй, Нерюнгри оройуоннарыгар “самоизоляция” эрэһиимэ биллэриллибитэ. Оттон муус устар 9 күнүттэн – Алдаҥҥа уонна Ленскэйгэ.
Ол курдук Алдан куоракка киирии-тахсыы хааччахтанна. 14 күн обсерваторга сыппыт уонна анаалыһын “отрицательнай” эрэ буоллаҕына киириэххэ сөп. Оттон Алдаҥҥа эбэтэр куорат таһыгар үлэлиир дьон буруоппуһунан сылдьаллар. Таһаҕас тиэйэр массыыналар суоппардарын быраастар кэтээн көрөллөр.
ИДьМ Саха сиринээҕи салаатын үлэһиттэрэ төгүрүк суукканы быһа пуоска тураллар. Ону таһынан, куорат иһигэр бородууктаны, бастакынан туттуллар табаардары, кытаанах уонна убаҕас бөҕү тиэйэр массыыналартан ураты атын тыраанспардар сылдьаллара бобулунна.
Куорат баһылыга Северин Поздняков этэринэн, муус устар 12 күнүгэр куорат дьаһалтата олохтоохторго буруоппус түҥэппит. Бу буруоппус нөҥүө күнүгэр дьиҥэ суох буолара сэрэтиллибит.
“Куоракка киирии-тахсыы сабылла илигинэ, дьон Солнечнай түөлбэҕэ, Нижний Куранахха о.д.а. сирдэргэ үлэлэригэр барбыттара. Кинилэр дьиэлэригэр төннөн кэлэллэрин курдук буруоппус биэрбиппит. Бу буруоппус биир күннээх буоларын сэрэппиппит. Билигин Алдаҥҥа киһи олоҕун хааччыйар тэрилтэлэр массыыналара: аварийнай, коммунальнай сулууспалар, суол тиэхиньикэлэрэ, суһал көмө, бородуукта тиэйэр массыыналар эрэ сылдьаллар. Биллэн турар, эрдэ бэриллибит буруоппуһунан айанныан баҕалаах чааһынайдар бааллар. Куоракка 37 маҕаһыын сабылынна. Биир урбаанньыты кытта билигин харантыыҥҥа олорор Ленинскай бөһүөлэгэр бородуукта таһарын курдук кэпсэттим.
Балаһыанньабыт ыарахан. Олохтоохтор ылыллыбыт миэрэлэри өйүүллэр. Биһиги бу кэми этэҥҥэ туоруохпут диэн эрэнэбин. Суһал штаб төгүрүк суукканы быһа үлэлиир. Алдаҥҥа хоруона-вируһун аҕалбыт киһи холуобунай эппиэтинэскэ тардыллыахтаах”, – диэн Поздняков иһитиннэрдэ.
Виктория СТАСЬ.
