Бу сылтан хоту сытар оройуоннар олохтоохторун өйүүр сыаллаах “Эдэр табаһыт” уонна “Арктика учуутала” диэн бырагырааммалар олоххо киириэхтэрэ. Бу туһунан ТАСС-ка СӨ Арктика сайдыытыгар уонна хотугу норуоттар дьыалаларыгар министиэристибэтэ иһитиннэрбит.
“Ил Дархан Айсен Николаев көҕүлээһининэн, 2020 сылга “Эдэр табаһыт” бырагыраамма олоххо киириэҕэ. Ол курдук хоту улуустарга олорор 35-гэр диэри саастаах уонна бу эйгэҕэ түөрт сылтан итэҕэһэ суох үлэлээбит табаһыттарга, олорор дьиэлэрин усулуобуйатын тупсаралларыгар 1 мөл солк көрүллүөҕэ. Оттон “Арктика учуутала” бырайыак сыала-соруга диэн, квалифицированнай исписэлиистэри өйөөһүн, Арктикаҕа үөрэх хаачыстыбатын тупсарыы буолар”, – диэн миниистир Владимир Черноградскай эппитин иһитиннэрэллэр.
2020 сылга “Эдэр табаһыт” бырагыраамма өрөспүүбүлүкэтээҕи бүддьүөттэн үбүлэнэр. Оттон “Арктика учуутала” бырайыакка өрөспүүбүлүкэтээҕи бүддьүөккэ 10 мөл солк үп көрүллүбүт.
Уон сыл иһигэр табаһытынан үлэлиир дьон ахсаана аҕыйаабыт. Ол курдук 2010 сыллаахха 2388 киһи эбит буоллаҕына, 2019 сылга 1364 киһи буолбут. Ону таһынан, таба ахсаана эмиэ аҕыйаабыт. 2010 сылга 200 тыһ тахса төбө эбит буоллаҕына, 2019 сылга 146 тыһ тахса төбө буолбут.
