Бүгүҥҥүттэн чэпчэтиилээх сурутуу саҕаланна. Онон сибээстээн, “Ситим” медиа-бөлөх “Почта России” тэрилтэ үлэһиттэригэр – хаһыаты, биэнсийэни тарҕатааччыларга элбэхтэ кэтиллэр мааскалары бэлэхтээтэ. Бү үтүө санаа аахсыйатыгар кыттыһаргытыгар ыҥырабыт!
“Бүгүҥҥүттэн сыл иккис аҥаарыгар чэпчэтиилээх сурутуу декадата саҕаланна. Почта үлэлээбитин курдук үлэлии турар. Кэлэн сурутуоххутун эбэтэр билиҥҥи кэмҥэ дьиэҕититтэн тахсыбакка эрэ саайт нөҥүө сурутуоххутун сөп. Онон кытаатан сурутуҥ, ааҕыҥ, почтаны кытта бииргэ буолуҥ!”, – диэн “Почта России” Саха сиринээҕи салаатын дириэктэрэ Петр Владимирович Птицын эттэ.
Хоруона хамсыгынан сибээстээн, Арассыыйаҕа барытыгар муус устар 30 күнүгэр диэри “дьиэҕэ хааччахтаныы” эрэсиимэ биллэриллэн турар.
Кыра кыһалҕалаах дьон, чуолаан аҕам саастаахтар, кэлэллэрэ-бараллара көҥүллэммэт. Кэлиэҕи-барыаҕы баҕарбыт да иһин, билигин тэрилтэ үксэ үлэлээбэт – сабыллан турар.
Муус устар 20 күнүттэн 2020 сыл иккис аҥаарыгар “КЫЫМҤА”, “СИТИМ” бөлөх таһаарыыларыгар чэпчэтиилээх сурутуу саҕаланар. Бу хоруона хамсыга сүгүнүнэн сүктүбэтэ, эйэ дэмнээхтик арахсан биэрбэтэ сылыктанар. Сорох медиктэр “ыарыы төгүрүк сылы быһа түбүлүө” диэн түүйэллэр. Чэ, куһаҕанын талан эттэххэ, дьиэҕэ хаайыллан олоруубут сайыны-күһүнү да быһа салҕанан барыан сөп. Онон дьиэҕэ олорор кэмҥэ ыаһах гынан хаһыаты ааҕыы, билиини-көрүүнү сомсуу – саамай туһалаах дьарык.
Киһи дьиэҕэ иллэҥ олорор кэмигэр туох эрэ туһалааҕынан дьарыктана, үөрэнэ, билиитин-көрүүтүн хаҥата, саҥа технологиялары баһылыы олоруохтаах. Онон сибээстээн, саҥа инновация ньымаларын баһылыы таарыйа, оҕолоргутун-сиэннэргитин көмөлөһүннэрэн, хаһыаты-сурунаалы электроннай ньыма көмөтүнэн сурутарга үөрэниэххитин сөп. Кэлии-барыы харгыстаммыт, уустугурбут кэмигэр, “КЫЫМ”, “СПОРТ ЯКУТИИ” хаһыаттары, “БАЙДАМ”, “КҮРҮЛГЭН”, “БЭЛЭМ БУОЛ+”, “ХАТАН” сурунааллары-хаһыаттары дьиэҕититтэн тахсыбакка олорон саайтынан, мобильнай сыһыарыынан сурутуоххутун сөп.
Хайдах сурутары быһаарабыт:
PODPISKA.POCHTA.RU саайт нөҥүө
Бастатан туран, PODPISKA.POCHTA.RU саайка киир.
1. Сурутуоххун баҕарар хаһыаккын уонна сурунаалгын тал (5 000 араас таһаарыы баар):
– индексинэн;
– тиэмэнэн эбэтэр интэриэһинэн;
– алпаабытынан;
– аатынан;
– биллэр-көстөр таһаарыылар испииһэктэриттэн;
(көрдүүр строкаҕа “Кыым” диэтэххинэ, тута тахсан кэлэр)
2. Тиэрдии ньыматын талаҕын (аадырыска диэри/почтаттан ылыы).
3. Дааннайгын суруйаҕын: аадырыһыҥ, аатыҥ-суолуҥ.
4. Сурутар болдьоххун талаҕын (холобур, 6 ый).
5. Саайка регистрацияланаҕын.
6. Сакааскын төлүүгүн.
“ПОЧТА РОССИИ”
мобильнай сыһыарыы көмөтүнэн
1. “Плей маркеттан” төлөпүөҥҥэ “Почта России” диэн мобильнай сыһыарыыны хачайдаа.
2. Сыһыарыыга киир.
3. Уҥа өттүгэр аллараа муннукка “Еще” диэни баттаа.
4. “Подписка на журналы и газеты” диэн строканы баттаа.
5. Сурутуоххун баҕарар хаһыаккын уонна сурунаалгын тал (5 000 араас таһаарыы баар):
– индексинэн;
– тиэмэнэн эбэтэр интэриэһинэн;
– алпаабытынан;
– аатынан;
– биллэр-көстөр таһаарыылар испииһэктэриттэн;
(көрдүүр строкаҕа “Кыым” диэтэххинэ тута тахсан кэлэр)
6. Тиэрдии ньыматын тал (аадырыска диэри/почтаттан ылыы).
7. Дааннайгын суруй: аадырыскыт, ааккыт-суолгут.
8. Сурутар болдьоххун тал (холобур, 6 ый)
9. Саайка регистрациялан
10. Сакааһы төлөө.
“КЫЫМЫ” – мобильнай баанынан!
“Ситим” таһаарыыларыгар мобильнай баанынан эмиэ сурутуоххун сөп. Дьиэҕиттэн тахсыбакка олорон хаһыаты сурутуоххун баҕардаххына, 8 924-563-65-88 эрийэн сиһилии билис!
Ыйан-кэрдэн, сүбэлээн биэриэхтэрэ.
Күндү ааҕааччыларбыт! Хаһыаты ааҕар, сурутуон баҕарар, ол эрээри интэриниэти туһанары ыарырҕатар, сатаабат аҕа саастаах төрөппүттэргитигэр, ыалларгытыгар, аймах-билэ дьоҥҥутугар “Кыымы” мобильнай сыһыарыынан, саайтынан сурутан биэриҥ.
Сэҥээриилэр