Бүгүҥҥү брифиҥҥэ Ил Дархан Айсен Николаев хоруона вируһун балаһыанньатын туһунан иһитиннэрдэ.
“Балаһыанньа уустук. Суукка иһигэр түөрт киһи ыалдьыбыта билиннэ. Ол курдук, Дьокуускайга икки, Алдаҥҥа биир уонна Нерюнгри оройуонугар биир киһи ыалдьыбыт. Дьокуускайга эрдэ ыалдьыбыт киһи аймаҕа уонна Москубаттан кэлбит киһи ыалдьыбыттар. Бу киһи кэлээт да “самоизоляцияҕа” олорбут. Нерюнгрига ыалдьыбыт дьахтар эмиэ “самоизоляцияҕа” олорбут. Оттон Алдаҥҥа обсерватор үлэһитэ ыалдьыбыт”, — диэн Айсен Николаев иһитиннэрдэ.
Ыалдьыбыт дьон туруктара этэҥҥэ. Ол эрэн, Дьокуускайга икки киһини ИВЛ аппараатыгар холбообуттар.
Сунтаар улууһугар Кутана нэһилиэгиттэн чугас сытар баахта бөһүөлэгэр, муус устар ый 30 күнүгэр диэри харантыын биллэрилиннэ. Бөһүөлэк сабыллыбыт, манна быраабы харыстыыр уорганнар үлэлииллэр.
Оттон Чаяндаҕа 10 тыһ кэриҥэ анаалыс ылыллыбыт. Анаалыстары Москубаҕа уонна Санкт-Петербурга ыыппыттар.
