Муус устар 22 күнүттэн волонтердар 65-тэн үөһэ саастаах дьоҥҥо биирдэ бэриллэр босхо бородуукта нобуорун түҥэтиини саҕалаатылар. Бу туһунан СӨ баһылыгын уонна бырабыыталыстыбатын пресс-сулууспата иһитиннэрэр.
Бу күҥҥэ номнуо 5000 тахса сайаапка киирбит. Бэҕэһээ 343 киһи босхо бородуукта уонна фрукта, оҕуруот астарын ылбыттар.
“Кол-кииҥҥэ 15 волонтер үлэлиир. Кинилэр сайаапкалары тэҥинэн хомуйаллар. Инньэ гынан, үлэ бириэмэтигэр элбэх сайаапканы ыла сатыыбыт. Ону таһынан, хоруона вируһа тарҕаммыт оройуоннарыгар 65-тэн үөһэ саастаах дьон испииһэгин оҥоруохтара. Бу үлэ тэтимин түргэтэтиэ”, – диэн волонтердар куорпустарын бэрэссэдээтэлэ Александр Сусоев иһитиннэрэр.
Сайаапкалары 8 (800) 200-34-11 федеральнай уонна 8 (800) 100-14-03 өрөспүүбүлүкэтээҕи нүөмэрдэринэн ылаллар. Ону таһынан, 8 (4112) 35-10-46 волонтердар куорпустарын нүөмэригэр эрийэн биэриэххитин сөп.