Өрөспүүбүлүкэ үрдүнэн биир күн иһигэр хоруона вируһунан өссө сэттэ киһи ыалдьыбыта бэлиэтэннэ.
Ол курдук Өймөкөөн улууһун Усть-Нера бөһүөлэгэр баахтаҕа үлэлиир киһи ыалдьыбыт. Билигин манна харантыын миэрэлэрин киллэрэр үлэ ыытыллар. Ыалдьыбыт киһи чугастык алтыспыт дьоно быһаарыллыбыт.
Дьокуускайга биэс киһи ыалдьыбыт. Олортон иккитэ Чаяндаҕа үлэлиир дьон. Кинилэр билигин киин куоракка эмтэнэ сыталлар. Икки киһи эрдэ ыалдьыбыт дьонтон сыстыбыттар. Оттон биир киһи суут приставын үлэһитэ буолар. Кини хантан сыстыбыта биллибэт.
Өссө биир киһи Ленскэйгэ ыалдьыбыт, кини эмиэ Чаянда үлэһитэ.
Онон “самоизоляция” эрэсиимин тутуһар булгуччулаах. Атын куораттар уопуттара үчүгэй көрдөрүүлээҕэ көстөр. Ордук промышленнай куораттарга улахан болҕомто ууруллуон наада. Алдаҥҥа суһал штаб үчүгэйдик үлэлиир.
