Ыам ыйын 3 күнүгэр, 16 ч. туругунан өрөспүүбүлүкэҕэ коронавируһунан ыалдьыбыт киһи ахсаана 282-гэ тиийдэ. Бу туһунан Айсен Николаев брифинг кэмигэр эттэ.
Ил Дархан иһитиннэрбитинэн, суукка иһигэр Саха сиригэр 19 киһи коронавирустаабыта бигэргэммит, биир ыарыһах үтүөрбүт. Дьокуускайга 17 киһи ыалдьыбыт, сүрүннээн Харах балыыһатыгар хаптарбыт ыарыһахтар алтыспыт дьоно. Ленскэйгэ уонна Мэҥэ Хаҥаласка биирдии ыарыһах бигэргэммит. Кинилэр бары инфекционнай балыыһаҕа эмтэнэ киирбиттэр. Билиҥҥитэ алтыспыт дьонун булан анаалыстыыллар. Бэҕэһээ биир ыарыһах Дьокуускайдааҕы инфекционнай балыыһаттан үтүөрэн таҕыста. Уопсайа 37 киһи үтүөрбүтэ. Билигин 2 киһи олус ыарахан туруктаах сытар. Суукка устата 2511 тест оҥоһуллубут, обсерватордарга 703 киһи сытар. Чайыҥдатааҕы ньиэп-гаас баайдаах сиргэ Роспотребнадзор 39 ыарыһаҕы бигэргэппит. Олортон 23 ыарыһах Саха сиригэр уонна Ямал-Ненец автономиялаах уокуругар балыыһаларга сыталлар, 16 ыарыһах баахта бөһүөлэктэригэр эмтэнэллэр. Маны таһынан, Омскайга 50 ыарыһах сытар. Ил Дархан Чайыҥдатааҕы балаһыанньа хонтуруолга сылдьарын этэр.
