Чайыҥда үлэһиттэрин соҕуруу дойдуларыгар ыытыыны Таалакаан аэропуорда кыаммата. Онон, Чайыҥдаттан соҕуруу көтөр “Газпром” уонна бэдэрээттээх тэрилтэлэрин үлэһиттэрин, Мииринэй аэропуордун нөҥүө ыытар буоллулар.
Мииринэй куорат олохтоохторо мантан сэрэхэдийэллэрин учуоттаан, манна сыһыаннааҕы “Якутия24” саайтка суруйан турабын. Бу диэн эттэххэ, Таалакаан аэропуордун “Газпром” буолбакка, “Сургутнефтегаз” хампаанньа 2011-2012 сылларга туттарбыта. Үс биэрэстэ усталаах, 50 миэтэрэ туоралаах, тупсаҕай терминаллаах, аэробаксааллаах Таалакаан аэропуордун, ньиэп үлэһиттэрэ тус бэйэлэригэр эрэ анаан туппуттара. Мантан сүүнэ сөмөлүөттэринэн баахта үлэһиттэрэ Новосибирскайтан саҕалаан Сургутка, Москубаҕа тиийэ көтөллөр. Атын дьон бу аэробаксаалга биэрэстэ да сиргэ чугаһыыр бырааба суох. Тулата барыта – харабыл, шлагбаум. Оннук килэйбит-халайбыт Таалакаан аэропуорда ахсаана суох элбэх киһини, Чайыҥдаттан атын куораттарга таһыыны кыайбат буолан хаалла. Ноҕоруусканы Мииринэй аэропуорда сүктэ. Ол аата биһиги Роспотребнадзорбыт, эмчиттэрбит, ньиэп-гаас үлэһиттэрэ хас барыыларын арыаллыыр, бэрэбиэркэлиир буоллулар. Бэрээдэк оннук буолла. Аны сыыйа-баайа Мииринэйгэ, Чайыҥдаттан ыалдьыбыт баахта үлэһиттэрин аҕалан эрэллэр. Оннук буолуохтааҕа сэрэйиллэр этэ.
Станислав Алексеев, Мииринэй куората.
