Бэҕэһээ, ыам ыйын 24 күнүгэр, Сунтаар инфекционнай балыыһатыгар сыппыт “ВССМ” биэс хобдох туруктаах үлэһититтэн үс киһи үтүөрэн таҕыста.
Икки киһи салгыы эмтэнэллэр. Үтүөрбүт үс үлэһити дойдуларыгар ыытыахтарын оннугар, Кутана аттынааҕы баахта бөһүөлэгэр үлэлэтэ диэн ыыттылар. Арай, бу дьон ыарыылара хат көбөн турдун? Оннук буолуон сөп. “Аны манна баахта үлэлээбэт, бөһүөлэк сабыллар” диэбиттэрэ сымыйа буолла.
Кутана аттыгар баар баахта бөһүөлэгэр “РНГ-ВССМ” 19 саҥа үлэһитэ кэллэ. Сунтаардааҕы технологическай кэллиэс уопсайыгар, обсерватордарга сытар “ВССМ” 28 үлэһитин, төттөрү баахта бөһүөлэгэр төнүннэрээри соруналлара саарбахтаммат.
Дьэ, ол оннугар төрүт олохтоох нэһилиэнньэни бобуу-хааччахтааһын күүһүрдэ. Элгээйи, Кутана уонна да атын Бүлүү өрүс уҥуор сытар нэһилиэктэртэн, ханнык баҕар тыраанспарынан анал боруоппуһа суох улуус киинигэр Сунтаарга айанныыр бобулунна. Үс поруомтан биирдэрэ эрэ үлэлиир. Дьон хааччахтааһынтан олус эрэйдэннэ.
Станислав Алексеев, Мииринэй куората.
