Айсен Николаев сарсыардааҥҥы брифинигэр коронавирус балаһыанньатын билиһиннэрдэ.
Билигин балаһыанньа сол тупсан барбата. Ааспыт суукка устата эбии 82 киһи ыалдьыбыта билиннэ. Дьокуускайга 74 ыарыһах бигэргэннэ. Бэҕэһээ 73 киһи толору үтүөрэн тахсыбыта үөрдэр. Ол эрээри, ыарахан туруктаах ыарыһах күн-түүн улаатара дьиксиннэрэр: Дьокуускайга - 14, Мииринэйгэ - 4, икки киһи ИВЛ аппараатыгар холбонон сытар. Үс күн устата дезинфекция Дьокуускай куоракка күүскэ ыытыллыаҕа: бары тэрилтэлэр бүгүҥҥүттэн саҕалаан саньытаарынай ыраастаныыны ыытыахтара. Бородуукта маҕаһыыннара субуотаҕа үлэлииллэр, оттон баскыһыанньаҕа бары сабыллаллар. Бүгүн кууһунан атыылыыр маҕаһыыннар 16 ч. дылы үлэлииллэр, онтон бэнидиэнньиккэ дылы дезинфекцияҕа сабыллаллар. Дьиэҕэ олорор, “самоизоляция эрэсиимин” тутуһар олохтоохторго махталбын биллэрэбин. Бу күннэргэ ханна да быкпакка дьиэҕэ олоруҥ.
Бүгүҥҥү күннээххэ балаһыанньа маннык:
Уопсай бигэргэммит ыарыһах – 1705
Үтүөрбүт дьон ахсаана – 748 буолла.
