Саха сиригэр коронавирус тула балаһыанньа кытаанах. Суукка иһигэр 112 саҥа коронавирустаабыт киһи бигэргэннэ, 23 киһи үтүөрдэ. Бу туһунан Айсен Сергеевич 11 ч. брифинигэр кэпсээтэ.
— Дьокуускайга 95 киһи ыалдьыбыта билиннэ. Алдаҥҥа – 8, Хаҥаласка – 3, Мииринэйгэ – 2, Нерюнгрига, Тааттаҕа, Чурапчыга, Мэҥэ Хаҥаласка – биирдии ыарыһах бигэргэннэ. Инньэ гынан, өрөспүүбүлүкэҕэ уопсайа 2042 ыарыһах бигэргэннэ. Бэҕэһээ 23 киһи үтүөрэн таҕыста: Дьокуускайга – 21, Сунтаарга – 2. Уопсайа хамсык кэмигэр 841 киһи үтүөрэн таҕыста. Нам улууһугар балаһыанньа кытаанах, онно улуустааҕы оперативнай штаб үлэтэ үчүгэй буолан, ыарыы аны бас-баттах барбатын ситиһиэх курдукпут. Билигин ыам ыйын 9 күнүттэн саҕалаан ыалдьыбыт дьон алтыспыт дьонуттан ыарыы тарҕанар, саҥа көрдүгэн суох. Бу өрөбүллэргэ Дьокуускай олохтоохторо дьиэҕо олордулар, арааһа, дойдуга дьиэҕэ хааллан олорууга саамай үчүгэй көрдөрүүнү ситистибит. Бу хааллан олоруубут аҕйах хонугунан үчүгэйинэн дьайыа диэн эрэнэбин. Хомойуох иһин, өрөбүллэргэ Өлүөхүмэ улууһугар ыарыһахтар баар буоллулар, онон бэс ыйын 21 күнүгэр былааннаммыт Олоҥхо ыһыаҕын көһөрөр туһунан этии киллэрдим, ону бу нэдиэлэ бүтүөр дылы бырабыыталыстыба бигэргэтиэҕэ. Билигин 8 киһи ыарахан туруктаах сытар: Мииринэйгэ уонна Дьокуускайга. Дьокуускайга 89 саастаах эмээхсин ИВЛга холбонон сыппытын быраастар быыһаан ыллылар, билигин кини бэйэтэ тыынар. Онон быраастарга махталбын тиэрдэбин. 420 киһи туох да биллэр симптома суох ыарыыны аһарынар, кинилэр тастан эмтэнэллэр. Суукка устата өрөспүүбүлүкэ лабораториялара 3061 коронавирус анаалыһын оҥорбуттар, 784 киһи обсерватордарга сытар.
Инньэ гынан, ыарыы уопсай ахсаана 2042 буолла, үтүөрбүт киһи ахсаана – 841, 8 киһи суорума суоламмыт.
