М.К.Аммосов аатынан Хотугулуу-Илиҥҥи федеральнай университет салалтата Саха сиригэр хоруона хамсыгын бохсууга үлэлэспит волонтердарга харчынан бириэмийэлиир туһунан быһаарыныыны ылыммыт. Ол курдук, 550 устудьуон 10 000 солк. бириэмийэни ылыаҕа. Бу туһунан университет пресс-сулууспата иһитиннэрэр.
“Биһиги устудьуоннарбыт волонтердар кииннэригэр, өрөспүүбүлүкэ эмтиир тэрилтэлэригэр уонна нэһилиэнньэҕэ психологическэй көмөнү оҥорор кииҥҥэ үлэлээбиттэрэ. Кинилэр бэйэлэрин доруобуйаларын олук ууран туран олус кыһамньылаахтык үлэлээтилэр. Кинилэргэ махталбыт муҥура суох”, - диэн ыччат бэлиитикэтигэр уонна үөрэх таһынан үлэҕэ проректор Александр Ильин кэпсээбит.
Устудьуоннар идэлээх сойуустарын бэрэссэдээтэлэ Василий Попов быһаарбытынан, бу төлөбүр хамнас буолбатах, волонтердар ис сүрэхтэриттэн бэйэлэрин баҕаларынан харчы туһугар буолбакка, хамсыгы кытары сирэй көрсөн обсерватордарга, волонтердар кииннэригэр, изоляцияҕа олорор уонна ковидтаах ыарыһахтарга аадырыстаах көмөнү оҥорбуттарын иһин махталы биллэрэр бириэмийэ буолар. Волонтердарга 10 тыһ. солк. бириэмийэлэрэ бу нэдиэлэҕэ бэриллэр.
Хамсык кэмигэр ХИФУ волонтердара 2265 сайаапканы, “Биир ньыгыл” баартыйа волонтердарын кииннэригэр – 3 тыһ. тахса, өрөспүүбүлүкэтээҕи волонтердар кииннэригэр 24 тыһ. тахса сайаапканы толорбуттар. Күн-бүгүн волонтердар изоляцияҕа олорор кырдьаҕастарга көмөнү оҥоро олороллор.
