kyym.ru 2020.07.21. уонна “Кыым” хаһыакка “Беннет арыыта: устуоруйа арамаантыката уонна геобэлиитикэ иирсээнэ” диэн биология билимин хандьыдаата, РФ бочуоттаах полярнига, Арассыыйа быыһааччыларын Сойууһун Саха сиринээҕи салаатын бэрэссэдээтэлэ Н.А. Находкин салайааччылаах эспэдииссийэ мотуордаах “Кочевник” катамаранынан Дьокуускайтан Тиксиигэ, онтон Беннет арыытыгар аҕыс буолан баран эрэллэрин туһунан лонгридым бэчээттэммитэ.
Бүгүн Николай Александрович сибээскэ тахсан эспэдииссийэ этэҥҥэ баран иһэрин туһунан иһитиннэрдэ. Барар докумуоннарын толоруута уһаан, кэм да бүрүкүрээтийэ моһуоктаан, уонча хонук хойутаан турбуттар. Хас да хонук Лаптевтар муораларын туораан, Ляхов улахан арыытыгар тиийбиттэр. Күһүн биллэн күүстээх тыаллар саҕаламмыттар. Билигин муораҕа айанныырга халлаан көнөрүн кэтэһэ сылдьаллар.
Салгыы Олгуйдаах арыытыгар, онтон, дьэ, Беннет арыытыгар тиийиэхтээхтэр. Санаттахха, Н.Находкин эспэдииссийэтэ Беннет арыыта Арассыыйа, Саха сирин сорҕото буоларын бигэргэтэн, научнай стационар уонна быыһааччылар тохтуур сирдэрин – депо буолар саха балаҕанын тутар улахан геобэлитиичэскэй соруктаах. Балаҕаны, сэргэни тиэйэ сылдьаллар, таһаҕастара ыарахан буолан, айаннара бытаан үһү. Н.Находкин хойутаан тахсыбатахпыт буоллар, эргиллэн эрэр буолуо этибит диир. Ыраах Хотугу Муустаах акыйааҥҥа сылдьар саха хорсун муораһыттарыгар тыала суох чуумпу муораны, ситиһиилээх төннөллөрүгэр баҕарыаҕыҥ!
Владимир СТЕПАНОВ.
PS. Сонун бэчээттэммитин кэннэ Николай Александрович эбии хаартыска ыытта. Бу Ляховка олорор метеорологтары (иккиэн ыттаахтар) кытта түспүт хаартыскалара. Хаартысканы көрөн, муораҕыт чуумпурбут дуо диэбиппин, “суох, күүстээх шторм түһэ турар. Бу бухтаҕа хотуттан үрэр тыал кэлбэт, онон чуумпу, биллибэт” диэтэ.