Хотугулуу Илиҥҥи федеральнай университет хоруона хамсыктаах саҥа үөрэх дьылын көрсө 60 тыһ. мэдэссиинэ мааскатын, 190 устуука салгыны ыраастыыр рециркуляторы, 36 антисептик аптамаатын, 60 мэдэссиинэ пирометрын, 7 тепловизоры уонна биир туонна кэриҥэ дезинфекциялыыр суурадаһыны атыыласпыт. Бу туһунан университет пресс-сулууспата иһитиннэрэр.
“Университекка коронавирус тарҕамматын туһуттан эрдэттэн дьаһанан харыстанар тэриллэри атыыластыбыт. Маны таһынан киэҥ куорпустарга дьон тоҕуоруспатын диэн лиэнтэлээх тэйитэр тэриллэри ыллыбыт. Хас биирдии куорпуска хоруона хамсыгын туһунан кэпсиир былакааттар эҥин ыйаннылар. 30 тыһ. биирдэ кэтиллэр маасканы уонна 30 тыһ. элбэхтэ кэтиллэр маасканы ыллыбыт”, - диэн суруйаллар.
Бу иннинэ үөрэх кыһата мэдиссиинэ институтун килииникэтигэр уонна волонтердарга анаан 6 мөл. солк. харыстанар тэрили атыыласпыта. Санатар буоллахха, бастакы куурус устудьуоннара күнүскү үөрэххэ үөрэниэхтэрэ, оттон атыттар балаҕан ыйын 15 күнүгэр дылы дистанционнай ньыманнан үөрэниэхтэрэ.
