Балаҕан ыйын 23 күнүнээҕи туругунан, Саха сиригэр өссө 70 киһи хоруона вируһугар сутулунна. Ити туһунан суһал ыстаап мунньаҕар зампред Ольга Балабкина кэпсээтэ.
Ол иһигэр Дьокуускайга – 35, Эдьигээҥҥэ, Мэҥэ Хаҥаласка, Чурапчыга – 5-тии, Ленскэйгэ – 4, Үөһээ Дьааҥыга, Өймөкөөҥҥө -- 3-тии, Абыйга, Алдаҥҥа, Булуҥҥа, Намҥа, Хаҥаласка – 2-лии. Ыарыһахтар алтыспыт дьонноро быһаарыллыбыт.
Зампред тымныйыы, дьаҥ-дьаһах, тумуу ыйдара үүнэн балыыһаларга киирэр ыҥырыы элбээбитин этэр.
“Онон сибээстээн, сарсыҥҥыттан ординатураҕа үөрэнэр устудьуоннар быраастарга көмөҕө тахсыахтара, кинилэр, сүрүннээн, нэһилиэнньэҕэ быһаарар-өйдөтөр үлэҕэ сылдьыахтара. Билигин киһи барыта анаал туттарыан, КТ-га түһүөн баҕарар. Ол эрээри ити барыта мэдиссиинэ процедурата буолан, быраас анаатаҕына эрэ оҥоһуллар. Оттон быраастар, бастатан туран, көрдөрүүлээх, ыалдьыбыт эрэ дьону ыыталлар. Онон ардыгар кыратык тулуйуохха-кэтэһиэххэ наада.
Даҕатан эттэххэ, Саха сиригэр аан бастакы COVID-19 утары вакциналар кэллилэр. Бастакы вакцинаны хоруона хамсыгын утары быһаччы, ыкса үлэлэһэ сылдьар медиктэр ыллылар”, -- диэн хотун Балабкина кэпсээтэ.
