Чурапчы улууһун Кытаанах нэһилиэгэр (Килэҥки сэл.) бу дьыл кулун тутарыттан 90/25 миэстэлээх оскуола-саад тутуллар.
Тутуу сүрүн бэдэрээччитэ “Восток Капитал” ХЭУо иһитиннэрбитинэн, күн бүгүн монолит каркас ууруллуутун уонна эркини тутууга үлэ барар, тутуу туруору былааннааһына, насос уонна баһаар киэлитэ турар сирдэрэ оҥоһуллан бүппүттэр.
Хамсыгынан сибээстээн хааччахтаммыт миэрэлэринэн, төһө да үлэһит илии тиийбэтинэн, тутуу биир да күн тохтоон хаалбатах, барыта былаан быһыытанан барар. Саҥа оскуола-саад эһиил үлэҕэ киириэхтээх. Чурапчы улууһун дьаһалтата иһитиннэрбитинэн, оскуола-саад “Комплексное развитие сельских территорий” судаарыстыбаннай бырагыраама чэрчитинэн тутуллар. Маны таһынан, саҥа оскуола-саадка саҥа тимир көлөннөн хааччыйыахтара. Бу иннинэ Кытаанах оскуолатыгар “Газель” саҥа массыына күлүүһүн туттарбыттара.
