Уус Алдан Бороҕонугар бүгүн саҥа IT-киини арыйдылар. Бу туһунан сыыппара сайдыытын уонна инновация миниистирэ Анатолий Семенов кэпсээтэ.
Миниистир эппитинэн, бу улуустарга саҥа IT-кииннэри арыйыыга ыам-бэс ыйдарыгар ыытыллыбыт күрэххэ кыайбыт 6-с бырайыак олоххо киирдэ. Кини “IT-кииннэр биир соруктарынан – миэстэтигэр саҥа үлэ миэстэтин таһаарыы буолар”, - диэн бэлиэтээтэ. Министиэристибэ саҥа кииҥҥэ 1 мөл. солк. суумалаах тэрили атыылаһан биэрбит, улуус дьаһалтата сабыс-саҥа өрөмүөннээх дьиэни биэрбит. Саҥа кииҥҥэ оҕолор эрэ буолбакка. Улахан дьон эмиэ дьарыктаныаҕа. Маны таһынан, манна оҕолор босхо интэриниэтинэн туһанар коворкинг-кииннэрэ үлэлиэҕэ. Бу сыл бүтүөр дылы эбии 9 IT-киин арыллыаҕа. Уопсайа 17 киин арыллыахтаах.
