Чурапчы Чакырын дьиэлэригэр күөх төлөн холбонно. Гааһынан уматыгы киллэриини “2020-2025 сс. тыа сирин комплекснай сайыннарыы” судаарыстыбаннай бырагыраама иитинэн ыыппыттар. Бу туһунан улуус дьаһалтатын пресс-сулууспата иһитиннэрэр.
Чурапчы улууһун гаастааһын бырайыага 2016 сылтан саҕаламмыта. 2017 сыллаахха бөһүөлэк иһинээҕи ситими тардыы, наадалаах матырыйаалларынан хааччыллыы үлэтэ барбыт. Төһө да хамсык мэһэйдээн, үп-харчы аччаатар, кырыы сытар нэһилиэккэ күөх төлөн этэҥҥэ холбонно. Чакырга түргэн күүрүүлээх интернет оптоволокно лииньийэтэ, гаас ситимэ холбононнор уонна суол оҥоһуллан нэһилиэк сайдыытыгар саҥа саҕахтар арылыннылар. Быйыл Чакыр нэһилиэгэ тэриллибитэ 310 сыллаах үбүлүөйүн бэлиэтиир, онон күөх төлөн холбонуута икки бүк үөрүүнү түстээтэ. Хайахсыттан Чакырга дылы 12 км усталаах гаас ситимин “Эльпромгазстрой” ХЭУо бэдэрээт тэрилтэтэ киллэрдэ, оттон бөһүөлэк иһинээҕи ситими “СТНГ” АУо тардыбыт.
