Сабыылаах өрүс суолунан 3 айанньыты туоратан испит таксистка холуобунай дьыала тэрилиннэ. Бу туһунан ГИБДД пресс-сулууспата иһитиннэрэр.
Сэтинньи 24 күнүгэр ДПС сотрудниктара “Лена” федеральнай суолга “Тойота Гайя” масыынаны докумуонун бэрэбиэркэлээри тохтоппуттар. Бу суоппар Тааттаттан Дьокуускайга диэри харчыга дьону илдьэр өҥөнү оҥороро биллибит. “Таксист бэйэтин эрэ буолбакка, айанньыттарын олоҕунан оонньоон сабыылаах “Хатас-Павловскай” өрүс суолунан туораабыт. Дьолго, ууга түспэккэ нөҥүө биэрэги булбуттар”, - диэн иһитиннэриигэ этиллэр. Таксист айанньыттары “Индрайвер” көмөтүнэн булбут. Таксисит өрүс суола официальнайдык сабыылааҕын олус үчүгэйдик билэр эбит. Билигин суоппарга холуобунай дьыала көбүтүлүннэ, кинини 300 тыһ. солк. ыстырааптыахтарын, эбэтэр икки сылга дылы көҥүлүн быһыахтарын сөп.
Сэҥээриилэр