Саха сиригэр олунньу 1 күнүнээҕи туругунан, эбии 115 киһи хоруона хамсыгар хаптарбыта биллибит. Бу туһунан брифинг кэмигэр Ольга Балабкина иһитиннэрдэ.
Ол курдук, Дьокуускайга 42 киһи ыалдьыбыт. Мииринэйгэ — 24, Томпоҕо — 14, Алдан, Нерюнгри улуустарыгар — 6-лыы киһи, Ленскэй улууһугар — 3, Дьааҥы улууһугар — 2, Булуҥ, Кэбээйи, Бүлүү улуустарыгар — биирдии киһи ыалдьыбыттара биллибит. Суукка устатыгар өрөспүүбүлүкэ лабораториялара 1502 анаалыһы оҥорбуттар, уопсайа хамсык саҕаланыаҕыттан 923071 коронавирус анаалыһын чинчийбиттэр.
Билигин хоруона хамсыгын утары быһыыны нэһилиэнньэҕэ маассабайдык биэрии хампаанньата үгэннээн турар. Бүгүҥҥү туругунан Дьокуускайга 7150 киһи быһыыны ылбыт. Мииринэйгэ — 1014, Алдаҥҥа — 780, Бүлүүгэ — 686, Ньурбаҕа — 685. Төһө да сөптөөх вакцина миэстэтигэр тиэрдиллибитин иһин, кэккэ улуустарга дьон вакцианы ылан испэт. Ордук мөлтөх көрдөрүү Булуҥҥа — 35, Кэбээйигэ — 180, Дьааҥыга — 185, Горнайга — 195 уонна Уус Алдаҥҥа — 265 бэлиэтэнэр.
