Кулун тутар 29 күнүнээҕи туругунан, Саха сиригэр эбии 26 киһи COVID-19 ыарыылааҕа биллибит, бу туһунан брифинг кэмигэр Ольга Балабкина иһитиннэрдэ. Бэҕэһээ 25 киһи ыалдьыбытын буолбуттара.
Ордук элбэх киһи киин куоракка ыалдьыбыт — 19 ыарыһаҕы бигэргэппиттэр. Иккилии ыарыһаҕы Бүлүү уонна Мииринэй улуустарыгар буллулар. Төһө да кэккэ улуустарга коронавирустаах киһи отой суоҕун үрдүнэн, онтон тутулуга суох өрөспүүбүлүкэ үрдүнэн хааччахтыыр миэрэлэр тутуһуллуохтаахтарын вице-премьер өссө төгүл санатта.
Саха сиригэр дьону маассабайдык вакцинациялааһын ыытылла турар. Кулун тутар 29 күнүнээҕи туругунан, өрөспүүбүлүкэҕэ 62412 вакцина дозата кэлбит. Бастакы вакцинаны 56570 киһи ылбыт, иккиһи — 50612. Сүүстэн тахса мобильнай биригээдэ үлэлиир. Быһыыны бастатан туран 60 саастарын ааспыт дьоҥҥо биэрэллэр, аҕа саастаахтартан 11480 киһи бастакы вакцинаны ылыбттар, иккиһи — 10011. Өрөспүүбүлүкэҕэ кэлбит вакцина 91,5% туһаныллыбыт. Бу нэдиэлэҕэ эбии вакцинаны хоту уонна Арктика улуустарыгар ыытыахтара, ол иһигэр таба ыстаадаларыгар. Ааспыт сууккаҕа 761 анаалыһы оҥорбуттар, хамсык саҕаланыаҕыттан өрөспүүбүлүкэ лабораториялара 1 мөл. 700 тыһ. 29 маннык анаалыһы оҥордулар.
"Ааспыт нэдиэлэҕэ Muus uSTAR ыччат бэстибээлэ уонна куорат баһылыгын быыбара буоллулар, онно элбэх киһи тоҕуоруста, онуоха балаһыанньаны учуоттаан, туох баар санитарнай-эпидемиологическэй ирдэбиллэри кытаанахтык тутуһан туран, суһал ыстааптар көҥүллэринэн эрэ ыыттыбыт", — диэн Ольга Балабкина бэлиэтээтэ.
