Саха сирин үөрэҕириитин эйгэтэ кэнники сүүрбэччэ сылларга дьиэ-уот, материальнай базата хаҥыырынан букатын атын, саҥа сайдыылаах таһымҥа таҕыста. Бу туһунан Ил Дархан уонна бырабыыталыстыба дьаһалтатын пресс-сулууспата суруйар.
Үүнэр көлүөнэлэр тус сыаллаах пуондаларын генеральнай дириэктэрэ Владимир Егоров иһитиннэрэринэн, Саха сиригэр оҕоҕо үөрэҕи тиэрдии эйгэтэ, усулуобуйата кэнники сүүрбэччэ сылларга лаппа тубуста:
«Кэнники сүүрбэ сыл устата 200 – тэн тахса саҥа оскуола Саха сирини араас улуустарыгар тутулунна. Билигин өрөспүүбүлүкэ устун массыынанан айаннаан ханна да тиийдэххэ, ханнык баҕар кыра нэһилиэнньэлээх пууҥҥа, саҥа оскуола дьиэлэрэ дьэндэйэн туралларын көрүөххэ сөп. Бу оскуолалар нэһилиэккэ олох эргийэр киинэ, тэбэр сүрэҕэ буолан туралларын киһи үөрэ көрөр», - диир.
Өрөспүүбүлүкэҕэ үөрэҕирии эйгэтин ситиһиитэ аҥаардас саҥа дьиэҕэ-уокка эрэ бэлиэтэнэр буолбатах, биир улахан ситиһиинэн – цифровизация буолар. Бүгүҥҥү күн туругунан, Саха сиригэр 500-тэн тахса оскуола уонна уһуйаан интэриниэт ситимигэр холбонон тураллар. Көмпүүтэр кылаастарын аныгы үйэ бүтэһик техникатынан хааччыйыы үс төгүл үрдээбит. Ыраах Арктика оскулаларыгар түргэн тэтимнээх интэриниэт хайдах курдук билии ыларга үтүө сабыдыаллааҕын туһунан Өлөөн улууһун орто оскуолатын, нуучча тылын уонна литирэтииритин учуутала Мария Исакова кэпсиир:
“Билигин, түргэн тэтимнээх интэриниэт баар буолан, биһиги үөрэтии саҥа ньымаларын баһылыыбыт, идэ өттүнэн үүнэбит-сайдабыт. Ханнык баҕар тиэмэҕэ быһаарыы булабыт, мунаарар боппуруостарбытыгар бигэргэтиллибит кырдьыктаах дааннайдартан хоруй буламмыт үлэбитигэр туһанабыт. Бу – биһиги үлэбитигэр олус улахан төһүү, тирэх. Үлэбит уота өссө көдьүүстээх, таһаарыылаах буолар”.
Саха сиригэр үөрэх тутууларын түргэн тэтимнээх интэриниэккэ холбонуу, Арассыыйа бэрэсидьиэнэ Владимир Путин көҕүлээбит «Цифровая экономика» национальнай бырыйыак чэрчитинэн ыытыллар. 2021 сылга диэри Саха сиригэр түргэн тэтимнээх интэриниэккэ холбонуу 435 оскуолаларга, колледжтарга, техникумнарга былааннанар.
