Норуоттар икки ардыларынааҕы аттаах айанньыттар гильдияларын кытта ситэ өйдөспөтөх быһыы-майгы тахсыбытыттан, марштрут уһук туочукатын аны Берлиҥҥэ уларыттылар.
Кулун тутар 1 күнүгэр Өймөкөөн улууһуттан ыҥыырдаах атынан хоҥнубут айанньыттар - удьуор сылгыһыт Дугуйдан Винокуров уонна кини күтүөтэ Мичил Неустроев Дьокуускайга кэллилэр. Улахан айан хайдах салҕанан баран иһэрин туһунан, News.Ykt.Ru – га бырайыак пресс-сэкиритээрэ Ньургун Габышев кэпсиир.
-Айанньыттар хайдахтарый? Инникитин туох былааннаахтарый?
- Барыта үчүгэй. Дьоннор да, сылгылар да этэҥҥэлэр. Айан былаһын тухары кинилэр Өймөкөөн, Томпо, Таатта, Чурапчы, Мэҥэ-Хаҥалас, Уус-Алдан улуустарын сирдэрин-уоттарын ортотунан, итиэннэ Тулагы, Хаҥалас бөһүөлэктэрин нөҥүө аастылар. Билигин кинилэр Үс Хатыҥ сирин-уотун ааһан эрэллэр, сотору АГАТУ ипподромугар кэлэн сынньалаҥҥа тохтуохтаахтар. Манна кинилэр салгыы айаҥҥа хоннохттохтук бэлэмнэниэхтээхтэр. Анаан-минээн бырайыагы өйүөхтэрин баҕарар успуонсар дьону кытта көрсүөхтээхтэр. Сылгылар толору ветеринарнай көрүүнү ааһыахтара, чиптаныахтара, туйахтарын боккуобалыахтара.
- Сураҕа, маршрут уһук туочуката уларыйбыт үһү? Бу кырдьык? Ол туохтан ситимнээҕий?
- Бу – кырдьык. Уолаттар билигин Германияҕа, Берлин туһаайыытынан туруннулар. Биричиинэтэ – The Long Riders Gulid (Норуоттар икки ардыларынааҕы аттаах айанньыттар гильдияларын) кытары кыра ситэ өйдөспөтөх быһыы-майгы. Биһиги эрдэ Никита Грецины кытары толкуйдаабыт Лондоҥҥо диэри айаммытыгар, кинилэр бэйэлэрин ааптар быһыытынан бырааптарын биллэрдилэр. Бэрт кыраттан сылтаан улахан аймалҕан таһаарбат сыалтан биһиги маршруппут уһук туочукатын уларытарга быһаарынныбыт. Хаһан эрэ Аҕа дойду Улуу сэриитин саҕана саха сылгыта төрөөбүт буоруттан улуу Ильмень күөлгэ уонна онтон салгыы Берлиҥҥэ тиийбит маршрутун олук быһыытынан ылан, салгыы ыраах айаммытын салгыахпыт.
- Оччоҕо айаҥҥыт болдьоҕо эмиэ эрдэ этиллибитин курдук быһа холоон балтараа-икки сылынан хаалар?
- Кыра саппаастаах да буоллар, оннук хаалар. Ол эрээри мин саныахпар, уолаттар айаннарын кыайан, эрдэ тиийиэхтэрэ.
- Европа сиригэр киирэргэ бары докумуоннаргыт. Визаларгыт бэлэмнэр?
- Барыта кэриэтэ бэлэм. Виза да, докумуон да өртүнэн.
News.Ykt.Ru
(Ньургун Габышев хаартыскаҕа түһэриилэрэ).
