2021 сыл олунньу ый 25 күнүгэр “Саха” НКИХ ханаалыгар Н.Михалева-Сайа ыытар “Сэһэн сирэ” биэриитигэр ХИФУ бэрэпиэссэрэ, биллиилээх юрист М.М. Яковлев этиитинэн, Аҕа дойду Улуу сэриитигэр хорсун быһыыны оҥорон, “Герой СССР” диэн аакка түһэриллэн баран, иҥэриллибэтэх дьоммутун “Герой Республики Саха (Якутия) в ВОВ” оҥоруохха диэн этиитин саамай сөптөөҕүнэн ааҕабыт, өйүүбүт уонна туруорсабыт.
Аҕа дойду сэриитигэр Бүлүү улууһун 1 Күүлэт нэһилиэгиттэн 66 киһи ыҥырыллыбытыттан 24 киһи олоҕун толук уурбута. Сэриигэ ыҥырыллан барбыт буойуннартан биһиги нэһилиэк сүтүгэ – 36%. Онуоха эбии 1941-1945 сс. сэрии содулуттан аччыктаан-хоргуйан 92 киһибит суох буолбута. Онон Аҕа дойду сэриитин кэмигэр 1 Күүлэт нэһилиэгэ тугунан да кэмнэммэт ыар охсууну ылбыта.
Улуу Кыайыы 75 сылын баттаһа, араас сиргэ, ол иһигэр Арассыыйа территориятыгар ис уонна тас өстөөхтөрү кытта хорсуннук уонна дьоруойдуу охсуспут саха патриот буойуннарын, кинилэр дьоруойдуу быһыыларын үрдүктүк сыаналаан, чопчу элбэхтэн биир эмэ “Герой России” түһэриллэн баран, “Мужество” уордьанын ылбыттарга “Герой РС(Я)” диэн ааты иҥэрэргэ диэн өрөспүүбүлүкэтээҕи Уопсастыбаннай палаата аатыгар Бүлүү улууһун 1 Күүлэт нэһилиэгин олохтоохторун аатыттан көрдөһүү сурук суруйдубут.
М.М. Яковлев уонна биһиги көрдөһүүбүтүн өрөспүүбүлүкэ олохтоохторо, чопчу уолгут, чугас уруугут “итии туочукаҕа” охсуспут, сэриилэспит дьоруойдуу быһыытын толору сыаналаан, өй-санаа биир буолуутунан, патриоттуу киэн туттуунан бу сиэрдээх туруорсууну бука бары өйүөҕүҥ диэн ыҥырабыт.
Е.С. Васильев,В.И. Семёнов, нэһилиэк олохтоохторо.
