Күннээх Италия уола, экстремал-велосипедист Лоренце Бароне Дьокуускайтан – Анаабыр улууһун Үрүҥ Хайатыгар диэри уүун, унньуктаах айанын түмүктээтэ.
«Бу саамай тыйыс айан этэ мин олохпор. Бэйэм талбытым. Барбытым» Италия уола соҕотоҕун билэсипиэт миҥэнэн Эркээни хочотуттан ыраах Анаабыр улууһугар туруммута.
Бэҕэһээ киэһэ, Хаҥалас улууһун Бокуруоскай куоратыгар олорор, саха кэргэннээх Италияттан төрүттээх экстремал-велосипедист Лоренце Бароне бэйэтин билэсипиэтинэн Анаабыр улууһугар тиийэн, бэйэтин ыра санаатын толорон, сындалҕаннаах, уһун айанын түмүктээтэ. Ол туһунан кини, бэйэтин социальнай ситимигэр бэлиэтэннэ.
Айанньыт хас да төгүл төхтүрүйэн туран, 43 күн айаннаата. Бу иннинэ итальянец техниката харгыстаабыта уонна атаҕар улахан эчэйии ылан кылгас кэмҥэ тохтуурга күһэллэ сылдьыбыта. Соргулаах айан кулун тутар 8 күнүттэн саҕаламмыта, барыта Бароне билэсипиэтинэн 2801 км кэннигэр хаалларда.
«Мин бүүс-бүтүннүү бэйэбин ууран туран бу мүччүргэннээх сырыылаах, тыйыс айаммын түмүктээтим, билигин мин кут-сүр, эт-хаан өртүнэн букатын иилистэн, сынньанан, урукку чөлбөр түһүөхпүн наада. Ол эрээри бу үлүгэр бэйэбин тургутан көрүүм олохпор таах хаалбата, оруола – сүҥкэн. Астынным-дуоһуйдум, баай уопут иҥэринним, туох баар уурбут сырам-кыһамньым толуйда-боруостанна », – диэн бэлиэтээтэ итальянец.
Экстремал-айанньыт кини айанын болҕойон кэтээбит, кини туһугар ыалдьыбыт бар дьоҥҥо махтанар.
