Быйыл Дьокуускай куорат Труд уулуссатыгар турар урукку “Якутия” ФАПК тэрилтэ дьиэтин саҥардан-тупсаран эрэллэр. Онно “Үлэ кыбартаала” (“Квартал труда”) диэн креативнай кластер тэриллиэхтээх.
Бу күннэргэ кыбартаал аһылларын туһунан кэпсэтии буолла. Онно баһылык Евгений Григорьев, куорат баһылыгын солбуйааччылар, МКУ “Главстрой”, АУо “Корпорация развития РС (Я)”, о.д.а. тэрилтэ бэрэстэбиитэллэрэ кытыннылар.
“Үлэ кыбартаала” диэн креативнай кластер Уһук Илин эрэгийиэнигэр бастакы уонна соҕотох эбийиэк буолуоҕа. Бу бырайыак чэрчитинэн урукку эт кэмбинээтин эбийиэгэ саҥардыллыаҕа. Эбийиэк уопсай иэнэ 13,3 тыһ. кв. миэтэрэ. Бу кластер 2021 сыл 4-с кыбаарталыгар үлэҕэ киириэҕэ. Саҥа кластер дьиэтэ 1200 миэстэлээх буолуо диэн былаанныыллар.
Кластер резиденнэрин сүрүн хайысхаларыгар анимация, киинэ, көмпүүтэр кыраапыката, хаартыска уонна видеопродакшн, блогинг, креатив ааҕыныстыбата, маркетинг, дизайн, архитектура, о.д.а. киирэллэр. Кластерга анимация бырайыактарын, көмпүүтэр кыраапыкатын оҥорон таһаарарга усулуобуйа оҥоһуллуоҕа, сыыппара контена тэриллиэҕэ.
“Биһиги өрөспүүбүлүкэбитигэр айти уонна киинэ индустриятыгар улахан ситиһии баар. Бу хайысхалары салгыы сайыннарыахпытын баҕарабыт. Бастакытынан, кластер үөрэҕирии хайысхатын кытта ыкса ситимнээх буолуоҕа. Устудьуоннарбыт маркетинг уонна биисинэс хайысхаларыгар ситиһиилээх, билиилээх-көрүүлээх буолалларыгар салайыахпыт. Онон киинэҕэ уонна айтига сыһыаннаах биир улахан былаһаакка тэриллэрэ улахан суолталаах”, -- диэн АУо “Корпорация развития РС(Я) тэрилтэ генеральнай дириэктэрэ Афанасий Саввин бэлиэтээн этэр.
Дьокуускай куорат сүрүн архитектора Семён Сергеев креативнай кластер резиденнэрин “Үлэ кыбартаала” дизайн-куодун оҥоруутугар көхтөөхтүк кыттарга ыҥырда.
