«Бүтүн олбуорунан ыллыыбыт»: куоракка сэрии бэтэрээннэригэр кэнсиэр

Кыайыы Күнүн иннигэр, бүтүн Арассыыйатааҕы «Бүтүн олбуорунан ыллыыбыт» аахсыйа чэрчитинэн, ыам ыйын 6 күнүгэр Дьокуускай куоракка Аҕа Дойду Улуу сэриитин кыттыылаахтара бэтэрээннэр олорор дьиэлэрин олбуордарыгар дьоҕус-кэнсиэрдэр ыытылыннылар.

Куорат дьаһалтатын пресс-сулууспатыгар иһитиннэрбиттэринэн, ыам ыйын 6 күнүгэр, Аҕа Дойду Улуу сэриитин кыттыылаахтара бэтэрээннэр олорор дьиэлэригэр, тоҕус олбуорга таһырдьа дьоҕус-кэнсиэрдэр ньиргийэни аастылар. Ыам ыйын 7 күнүгэр, кыайыылаах-буойуттары чиэстээнө өссө 13 кэнсиэр буолара күүтүллэр. Тэрээһиннэр хамсыгы утарар туох баар миэрэлэри тутуһан туран ыытыллаллар.

Киин куорат Гагаринскай уокуругар Аҕа Дойду Улуу сэриитин кыттыылааҕар Семен Иванович Колтовскойга анаан кэнсиэр ыытылынна. Түннүктэн кэнсиэри көрө турбут бэтэрээҥҥэ уонна кини ыалларыгар анаан Г.М. Кривошапко аатынан судаарыстыбыннай филармония солистара итиэннэ “Служба 02” бакаал ансаамбыла киһи сүргэтин көтөҕөр бэртээхэй кэнсиэр көрдөрдүлэр. Сэрии кэнниттэн Семен Иванович милииссийэҕэ өр сылларга үлэлээбитэ, ИДЬМ туйгуна буолбута. Биэдэмистибэ ытык кырдьаҕаһын өрөспүүбүлүкэтээҕи ис дьыала миниистирин солбуйааччы ис сулууспа полковнига Владимир Климов эҕэрдэлээтэ.

Билиҥҥи кэм туругунан Дьокуускай куоракка 37 - Аҕа Дойду Улуу сэриитин кыттыылаахтара, 19 - Ленинград блокадатын олохтоохторо, 5 - саастарын ситэ иликтэринэ фашист концлагердарыгар сылдьыбыт дьон, 224 сэрии огдооболоро, 1350 тыыл бэтэрээнэ, 8400 сэрии оҕолоро олороллор.