Руфов Пантелеймон Михайлович Саха Өрөспүүбүлүкэтин тыатын хаһаайыстыбатын үтүөлээх үлэһитэ, Саха Өрөспүүбүлүкэтин тыа хаһаайыстыбатыгар судаарыстыбыннай бириэмийэ лауреата, билигин баара эбитэ буоллар 80 сааһын бэлиэтиэ этэ. Үөһээ Бүлүү улууһун бастыҥ механизатора, комбайнера, бурдук үүннэрэр звено салайааччыта, бурдук үүннэриитин рекордсмена. Нам, Балаҕаннаах нэһилиэктэрин, Үөһээ Бүлүү улууһун бочуоттаах олохтооҕо.
Өрөспүүбүлүкэҕэ киэҥник биллибит бурдук үрдүк үүнүүтүн маастара Пантелеймон Михайлович Руфов Балаҕаннаахха төрөөбүтэ, дьоллоох оҕо сааһа онно ааспыта. Кини Аана, Мэхээлэ Кардашевскайдар диэн ытык-мааны ыалга бастакы оҕонон күн сирин көрбүтэ. Бырааттара: Бүөтүр тыа хаһаайыстыбатын үлэһитэ оттон Анатолий учуутал идэлээх. Иккиэн дьонҥо-сэргэҕэ ытыктанар үлэһиттэр. Кэргэнэ Раиса Денисовна үйэтин тухары суот-учуот үлэһитэ, өрөспүүбүлүкэҕэ киэҥник биллибит "Көмүлүөк" аҕам саастаах дьон уус-уран кэллэктиибин тэрийээччитэ, салайааччыта, билигин бочуоттаах сынньалаҥҥа олорор.
Улахан кыыһа Сардаана Пантелеймоновна – аҕатын утумнаан агроном идэлээх бурдук үүннэрэр звеноҕа үлэлээн, үрдүк үүнүүнү ылсыбыта. Нам нэһилиэгин дьаһалтатын баһылыгын солбуйааччытынан өр кэмҥэ үлэлээбитэ.
Орто кыыһа Айталина Пантелеймоновна – Дьокуускай куорат пенсионнай управлениетын отделын салайааччыта.
Уола Виталий Пантелеймонович – өр сылларга Үөһээ Бүлүү, Уус-Алдан улуустарыгар байыаннай кэмитиэти салайбыт подполковник .
Кыргыттара: Любовь Пантелеймоновна ИДЬМ-ҥа сулууспалыыр, Анадора Пантелеймоновна медицина үлэһитэ, үчүгэйдик үлэлии-хамныы сылдьаллар.
Оҕолор бары кэргэннээхтэр, оҕолоохтор, сиэннээхтэр.
Бэҕэһээ кэргэнэ оҕолоро, күтүөттэрэ, сиэннэрэ, тапталлаах аҕалара, эһээлэрэ Пантелеймон Михайлович олорбут дьиэтигэр мемориальнай дуоска туруордулар.
Нам, Балаҕаннаах нэһилиэктэрин баһылыктара: А.И. Кардашевскай, С.И. Дмитриев, табаарыстара, аймахтара кэлэн ытыктыыр киһилэрэ олохтон туораабыта биир сылыгар аналлаах кэриэстэбил күнүгэр сырыттылар. Үөлээннээхтэрэ, чугас аймах-билэ дьоно кини үлэтин-хамнаһын туһунан истиҥ-иһирэх ахтыы оҥордулар. Оҕолоро, кийиитэ, күтүөттэрэ аҕаларын туһунан кинигэ таһаартарар былааннаах үлэлии сылдьаллар.
Улууска, өрөспүүбүлүкэ таһымынан даҕаны кини үлэтин-хамнаһын билэр, бииргэ алтыспыт дьоно-сэргэтэ Пантелеймон Руфов туһунан бэйэлэрин ахтыыларын суруйан ыытыахтара диэн эрэнэ саныыбыт.
Степан Дмитриев
Үөһээ Бүлүү улууһун Балаҕаннаах нэһилиэгин баһылыга, Саха Өрөспүүбүлүкэтин норуотун хаһаайыстыбатын үтүөлээх үлэһитэ, Үөһээ Бүлүү улууһугар 1995-2011 сс. тыа хаһаайыстыбатын управлениетын салайааччыта.
