Саха сиринээҕи үлэ уонна социальнай сайдыы миниистирэ Елена Волкова социальнай сулууспа үлэһиттэрин профессиональнай бырааһыннньыктарынан эҕэрдэлээтэ.
Социальнай үлэһиттэр баар буоланнар, элбэх кыаммат-түгэммэт дьон көмө ылаллар, сарсыҥҥы күннэригэр эрэллээхтэр, диэн бэлиэтээтэ миниистир.
«Бүгүн биһиги профессиональнай бырааһынньыкпытын бэлэтиибит – Социальнай үлэһит күнүн! Итии-истиҥ эҕэрдэбин тиэрдэбин! Күндү кэллиэгэлэр, эһиги тулуурдаах-дьулуурдаах үлэҕит баар буолан, нэһилиэнньэ үгүс араҥата: бэтэрээннэр, инбэлииттэр, элбэх оҕолоох ыаллар, тулаайах оҕолор уонна туох баар олох ыарахан түгэнигэр түбэспит дьон ыарахаттары туоруулларыгар эһиги күннэтэ үлэлиир үлэҕит күүс-көмө, тирэх буолар!» - диэн эҕэрдэлээтэ Волкова.
Төһө да хамсык саба бүрүкээн турдар, өрөспүүбүлүкэ социальнай сулууспата нэһилиэнньэҕэ киэҥ далааһыннаах араас судаарыстыбыннай уонна социальнай өҥөнү оҥорор, "билиҥҥи кэм-кэрдии охсууларын кытары аахсыбакка" диэн бигэ эрэллээх миниистир.
Социальнай үлэһит күнүн Арассыыйаҕа бэс ыйын 8 күнүгэр бэлиэтииллэр. Бырааһынньык Арассыыйа бэрэсидьиэнэ Владимир Путин 2000 сыллаахха, алтынньы 27 күнүнээҕи уурааҕынан бигэргитиллибитэ.
Бу күн, 1701 сыл, бэс ыйын 8 күнүгэр Петр I ыраахтааҕы умнаһыттарга, ыарыһахтарга уонна кыаммат кырдьаҕастарга анаан бастакы судаарыстыбыннай баҕадыанньа арыйарга уураах баттаабыта.
Билиҥҥи кэмҥэ социальнай хааччыйыы тутулугар, социальнай көмүскэл уорганнарын таһынан, аҕам саастаах сааһырбыт дьоҥҥо уонна инбэлииттэргэ анаммыт интэринээт-дьиэлэр киирэллэр.
Хамсык кэмигэр, коронавирус бэлиэтэммит гражданнарын кытары ыкса үлэлэһэр кэккэ социальнай үлэһиттэргэ, эбии социальнай төлөбүрдэр көрүлүннүлэр.
