Киир

Киир

Эһиил, 2022 с., Саха Өрөспүүбүлүкэтэ төрүттэммитэ 100 сылын туолар. Саха норуотун сайдыытыгар, өрөспүүбүлүкэ төрүттэниитигэр сүҥкэн кылаатын киллэрбит дьоннортон биирдэстэринэн саха саарына Исидор Никифорович Барахов буолар. Өрөспүүбүлүкэ үбүлүөйүн көрсө кини биир дойдулаахтара Арктикатааҕы судаарыстыбыннай агротехнологическай т/х үнүбүрсүтүөтүгэр (АГАТУ) Исидор Барахов аатын иҥэрэргэ диэн туруорсаллар.

Үтүө саҕалааһын хайдах быһаарыллан иһэрин туруорсуу биир көҕүлээччитэ, Үөһээ Бүлүү улууһун, Балаҕаннаах нэһилиэгин баһылыга Степан Дмитриевтан ыйыттыбыт:

-- Үөһээ Бүлүү улууһун уопсастыбыннаһын аатыттан АГАТУ ректорын эбээһинэһин толорооччу Константин Константинович Кривошапкины кытта биллиилээх судаарыстыбыннай бэлитиичэскэй диэйэтэл, Саха АССР тэрийсибит дьонтон биирдэстэрин, САССР совнаркомун бастакы бэрэссэдээтэлэ, экэниэмикэ билимин хандьыдаата Исидор Никифорович Барахов аатын АГАТУ-га иҥэрэр туһунан кэпсэтии ыыттым.

Бу үрдүк сыалы ситиһэр санааттан, юрист Федор Лазаревич Николаев Арассыыйа тыа хаһаайыстыбатын миниистирэ Патрушев аатыгар И.Н. Барахов аатын АГАТУ га иҥэрэр туһунан сурук ыыппыта. Суругу болҕомтоҕо ылан, Арассыыйа т/х министиэристибэтин аатыттан Федор Николаевка харда сурук кэлбитэ. Бу сурукка олоҕуран, АГАТУ кэллэктиибэ дьүүллэһэн, быһааран баран министиэристибэҕэ этии киллэриэхтээх.

Мин Өрөспүүбүлүкэ Ил Дархана Айсен Николаев аатыгар АГАТУ га И.Н. Барахов аатын иҥэрэр туһунан туруорсуу сурук суруйбутум. Харда сурукка Айсен Сергеевич аатыттан АГАТУ урукку ректора Иван Слепцовка бу боппуруоһу кэллэктиип мунньаҕар дьүүллэһэн быһааралларыгар сорудах бэриллэн турар диэн этиллибит этэ. Санаммыт санаабытын тиһэҕэр хайаан да тиэрдэр санааттан АГАТУ урукку ректора Иван Слепцову тус бэйэтин кытары көрсө сылдьыбытым .

Түмүк быһаарсыыга И.И. Слепцов кэлэктиип 2021 с. олунньу ыйдааҕы мунньаҕар АГАТУ-га Исидор Барахов аатын иҥэрии боппуруоһун туруоруом диэн эрэннэрбитэ. Ол эрээри үөрэх кыһатын урукку салайааччыта билигин онно үлэлээбэт, баран испит хамсааһын тохтообута. Эһиил, Саха Өрөспүүбүлүкэтэ автономиятын ылбыта 100 сылын бэлиэтиирбит чугаһаата, биир эрэ сыл хаалла, онон төрөөбүт норуотун туһугар турууласпыт саха саарынын аатын ааттатыы соччонон оруннаах.

К.К. Кривошапкинтан бу боппуруоска туох санаалааҕын ыйыппыппар: “Итини барытын истибитим, билэбин, кырдьык АГАТУ-га 2022 сылга И.Н. Барахов аатын иҥэрии боппуруоһа турар. Ол эрээри биһиги иннибитигэр билигин бастакы уочарат АГАТУ акредитациятын ааһыыта турар. Онно докумуон бөҕө бэлэмнэнэ сылдьар. АГАТУ-га тахсыбыт түбэлтэ боппуруос быһаарылларын эмиэ уһатыан сөп. Ким да билбэт, тэрилтэ быһыытынан баар дуу, суох дуу буоларбыт кытта тутулуктаныан сөп. АГАТУ оннунан хаалар түбэлтэтигэр, биллиилээх судаарыстыбыннай, бэлитиичискэй диэйэтэл Исидор Никифорович Барахов аата иҥэриллэрин кэллэктиипкэ мунньахтаан быһаарыахпыт”, - диэн быһаарда.

Көрөргүт курдук, И.Н. Барахов аатын АГАТУ-га иҥэрэр үлэ бара турар. Ол туһунан инникитин билиһиннэрэ туруохпут.

Тарҕат:

Санааҕын суруй