Бэс ыйын 15 күнүгэр Саха сирин Үрдүкү суута Дьокуускай куораттааҕы суут кулун тутар 22 күнүгэр доруобуйа харыстабылын урукку миниистирин Людмила Вербицкаяны буруйа суоҕун толору билинэр туһунан уурааҕын хос көрдө уонна оннунан хаалларда.
Санатар буоллахха, Людмила Ильясовнаны дуоһунаһын аһара туһаныыга уонна соруйан сымыйа көрдөрүүнү биэриигэ уорбалаабыттара (ХК 307 ыст. 1 ч. уонна 286 ыст. 1 ч.). Силиэстийэ саныырынан, миниистири солбуйааччы 2-с №-дээх Өрөспүүбүлүкэтээҕи балыыһаҕа аһы-үөлү хааччыйыыга куонкуруһу тэрийиигэ кыайыылаах тэрилтэ туһатыгар докумуоннары уларыппыт диэн. Холуобунай дьыаланы ИДьМ силиэстийэлиир управлениета 2019 сыл муус устарыгар тэрийбитэ. Силиэстийэ кэмигэр Вербицкаяны дуоһунаһыттан босхолообуттара, силиэстийэ икки сылтан ордук барда. Суукка дьыаланы былырыын атырдьах ыйыгар ыыппыттара, ону куораттааҕы суут борокуруорга төттөрү ыыппыта. Бокуратуура ону кытары сөпсөспөтөҕө, дьыаланы куораттааҕы суут көрүүтүгэр былырыын сэтинньигэ хаттаан ыыппыттара. Быйыл кулун тутарга суут Вербицкая уорбланар ыстатыйаларыгар буруйа суоҕун толору быһаарбыта. Туох да буруйа суох киһини сымыйаннан күтүрээбиттэрин иһин, Людмила Вербицкая толору реабилитацияланар быраптаах уонна хоромньуну төлөттөрөр кыахтаах.
