Үөһээ Дьааҥытааҕы оройуоннар икки ардыларынааҕы борокуратуура баан ыстаарсай менеджеринэн үлэлээн олорбут дьахтарга тэриллибит холуобунай дьыаланы суут көрүүтүгэр ыыппыта.
Дьахтарга Арассыыйа ХК 160 ыст. 4 ч. (сулууспалаах балаһыанньатын туһанан бөдөҥ харчыны иҥэринии) холуобунай дьыала көбүтүллүбүтэ. Сууттанааччы былырыын от-атырдьах ыйдарыгар бэйэтин кирэдьииттэрин төлөөрү уонна араас брокерскай эпэрээссийэлэргэ, атыыларга кыттаары үлэтин кэмигэр кассаттан уу харчынан тутан тахсыталаабыт. Уопсайа оннук гынан 35 мөл. солк. уорбут. Онтун биллэримээри сымыйа кумааҕыны симэ-симэ, вакуумнаах хахха илиитин баттыы-баттыы харчы диэн кистии сатаабыта биллибит. Суут сиэмэх дьахтары 4 сыл 6 ый уопсай эрэсиимнээх хаайыыга утаарда, кинини суут саалатыттан тараччы тутан хаайдылар. Бириигэбэр сокуоннай күүһүгэр киирэ илик.
