Киир

Киир

Атырдьах ыйын 9 күнүгэр, урбаан, ырыынак, туризм сайдыытын Департамена уонна Дьокуускай куорат олохтоох дьаһалтатын экэниэмикэтин Департаменын оробуочай бөлөҕө, итиэннэ Бүтүн арассыыйатааҕы норуот фронун эрэгийэннээҕи салаатын бэрэстэбиитэллэрэ нэһилиэнньэ сөбүлээн сиир оҕуруот астарын сыаналарын кытта билистилэр. Ол курдук бөлөх сураста: хортуоска, сүбүөкүлэ, луук уонна хаппыста, судургутук эттэххэ «борщ наборун» билиҥҥи сыаналарын.

Сыананы кэтээн көрөр бөлөх кыттааччылара Труда уонна Билибина уулуссаларга баар оҕуруот аһын баазаларын кэрийдилэр. Кэтээн көрүү 15 атыылыыр туочуканы иилэ хапта.

Атыыһытттар бэйэлэрэ, оҕуруот аһыгар сыаналара төһө да түстэ диэтэллэр, сорох аска сыана сол да лаппа үрдүк.

Сүбүөкүлэ – 80 солк.

Луук – 55 солк.

Хортуоска – 70 солк.

Моркуоп – 85 солк.

Хаппыыста – 60 солк.

Саамай чэпчэки сыаналаах оҕуруот аһа, Билибина уулуссаҕа турар биир лааппыга көһүннэ. Ол курдук хаппыыста сыаната онно киилэтэ баара-суоҕа – 50 солк. диэн буолла.

Бүтүн арассыыйатааҕы норуот фронун Саха сиринээҕи салаатын салайааччыта Валерий Лютый биллэрэринэн, бу тэрээһин «Биир Ньыгыл Арассыыйа» сайыҥҥы кэмҥэ оҕуруот аһын сыанатын хонтуруоллуур көҕүлээһининэн барар.

Валерий Лютый тоһоҕолоон туран бэлиэтиир: «Биһиги сүрүн сыалбыт-сорукпут билигин, мантан күһүн оҕуруот аһын сыанатын хонтуроллааһын. Олохтоох тыа хаһаайыстыбатын бородууксуйата маннааҕы ырыынакка киирэрэ күчүмэҕэйдэрдээх буолан, билигин биһиги сыана үүнэ-тэһиинэ суох барааһынын тохтотуохтаахпыт».

Урбаан, ырыынак, туризм сайдыытын Департаменын салайааччыта Дмитрий Туприн тиэрдэр: “Хамыыһыйа атыылыыр туочукалары кэрийэн элбэх сокуону кэһиини тутта. Ол курдук атыыһыттар бородууксуйаларыгар сыаната төрүт да ыйыллыбатах, онон туһанан сыананы төһө баҕар үрдэтэ тураллар. Ону таһынан сорохтор олох да хаассабай аппараата суох үлэлии тураллар. Бэл көннөрү ыйааһыннара даҕаны суох. Ол барыта – сокуону куруубайдык кэһии!”.

Валерий Лютый, Роспотребнадзору уонна онтон да атын кэтиир уорганнары, ити курдук үөһэ ыйыллыбыт дьалаҕайдык үлэлиир атыыһыттары кытаанах кэтэбилгэ ыларга уонна ирдэбиллэри тутуспат буоллахтарына, лааппыларын олох да сабарга туруоруста.

Дьокуускай куорат олохтоох дьаһалтатын уопсастыбыннаһы уонна көрдөрөр-иһитиннэрэр эйгэни кытта ситимин Департамена.