Өлүөхүмэ куорат аэропордуттан көтүү быйыл сэтинньиттэн сөргүтүллүөн сөп. Онооҥҥу дылы аэропорт көтөр балаһатын өрөмүөннээн бүтэриэхтэрэ. Бу туһунан премьер Андрей Тарасенко улууска бара сылдьан иһитиннэрбит.
Кини этэринэн, матырыйааллары тиэрдии уонна үбү көрүү боппуруоһа толору быһаарыллыбыт. Сөмөлүөттэр чөлүгэр түһэриллибит аэропорт лиссиэнсийэни ыллаҕына биирдэ көтөллөрүн тоһоҕолоото, ону өрөмүөн бүттэ да ыла охсор соруктаахтар. Билигин тутуу 41 бырыһыана түмүктэнэн турар. Күнүстэри-түүннэри тохтоло суох 3 биригээдэ үлэлиир. Улуус баһылыга Николай Харбин эппитинэн, билигин үлэ хаамыыта биллэ тэтимирбит, былырыын 500 м балаһа бетоннаммыт буоллаҕына, билигин 1260 буолбут. Былаан быһыытынан 1670 м балаһын ууруохтаахтар.
Былырыын өрөспүүбүлүкэ салалтата Саха сиригэр 16 аэрпорду өрөмүөннүүргэ федеральнай үптэн 38 млрд солк. ылары ситиспитэ. Былаан быһыытынан, быйыл 7 аэропортка өрөмүөн түмүктэниэхтээх.
