Түргэн тэтимнээх оптоволокно интэриниэт 12 улууска 43 нэһилиэккэ киирдэ. Бу туһунан Ил Дархан уонна бырабыыталыстыба дьаһалтатын пресс-сулууспата иһитиннэрэр.
Интэриниэти холбооһун үөрүүлээх тэрээһинигэр Ил Дархан Айсен Николаев кытынна. Кини нэһилиэктэргэ түргэн интэриниэт уонна суотабай сибээс киирэн, олох биллэ тупсарыгар саарбахтаабатын эттэ. Кини "хамсыгы аахсыбакка туран, "Ростелеком" үлэһиттэрэ ханнык да ыарыхаттартан чаҕыйбакка үлэлээн түргэн сибээһинэн ыраах нэһилиэктэри хааччыйдылар", - диэтэ уонна махталын биллэрдэ.
"Сыыппараҕа бүтүннүү көспүт улуустар кэккэлэрэ хаҥыылларыттан үөрэбин. Күн бүгүн Хаҥалас улууһа бүтүннүү холбонон олорор, онно бары нэһилиэктэргэ ВОЛС киирэн турар. Мантан инньэ улуус бары салааларга тэтимнээхтик сайдарыгар саарбахтаабаппын", - диэтэ Айсен Николаев.
ВОЛСка холбонуу 2018 сыллаахха ВЭФ кэмигэр эрэгийиэн салалтата уонна "Ростелеком" инвестиционнай сөбүлэҥи түһэрсиэхтэриттэн ыла тэтимнээхтик барбыта. Бу сыллар усталарыгар 8,5 тыһ. км оптоволокно лииньийэтэ тардылынна, инньэ гынан өрөспүүбүлүкэ 88% олохтооҕо түргэн интэриниэтинэн хааччылынна. Сибээс миниистирэ Анатолий Семнов былырыын 38 нэһилиэк оптоволокноҕа холбоммутун, оттон бүгүн номнуо 43 нэһилиэк кыттыспытын эттэ уонна сыл бүтүөр дылы эбии 27 нэһилиэги холбуулларын эттэ.
