ВЭБ.РФ госкорпорация кыттыылаах, киин куораппытыгар 12 саҥа оскуола уонна 5 эбии тутуу киириэҕэ.
Бу туһунан куорат мээрэ Евгений Григорьев кэпсээбит. "ВЭБ.РФ корпорацияны кытары биһиги 12 саҥа оскуоланы уонна 5 оскуоларга эбии тутууну киллэриэхпит. Уопсайа 17 тыһ. миэстэ тахсыаҕа. Оччоҕуна онто да суох нэһиилэ симиллэн олорор оскуолалары босхолуохпут", - диир. Киин куораппытыгар миэстэ тиийбэтэ улахан кыһалҕа. "Өскөтүн 20 сыллааҕыта, 2001 сыллаахха куорат нэһилиэнньэтэ 200 тыһ. арыый кыра эбит буоллаҕына, билигин бэрэпиискэтэ суохтары аахтаххына, арааһа 370 тыһ. буолара буолуо. Ол иһин, оскуолаларга миэстэни таһаарарга маассабай тутуу ыытыллыахтаах", - диэн Евгений Григорьев эбэн эттэ.
