РФ Оборуонатын миниистирэ Сергей Шойгу атырдьах ыйыгар “Сибииргэ 1-дии мөлүйүөн нэһилиэнньэлээх 3 эбэтэр 5 саҥа куораты тутан билим-бырамыысыланнас уонна экэниэмикэ кииннэрин оҥоруохха наада. Сибиир эрэгийиэнин сайыннарыы дойду барытын сайдыытын көҕүлүө, өрө тардыа. Азия дойдуларын балысханнык сайда турар ырыынактарыгар тахсарга тирэх буолуо”, – диэбитэ. Уруккута МЧС, билигин Оборуона миниистирэ С.Шойгу хаһааҥҥыттан ыла саҥа куораттары тутууну, глобальнай экэниэмикэни быһаарар буолбутун билбэппит эрээри...
“Гражданскай инженерия лабаратыарыйатын” тэрийээччи, урбанист Петр Иванов ити идиэйэни улаханнык саарбахтыыр. Кини: “Билигин Арассыыйа нэһилиэнньэтэ олус күүскэ көҕүрүү турар, оттон арҕааҥҥы уобаластартан дьон Сибииргэ көһөн бараллара саарбах. Кытайдар дуу, Сталин саҕана дуу курдук дьону хамаанда-дьаһалта ньыматынан кыһалаҥынан көһөрөн аҕалар кэмнэр ааспыттара. Оннук кэмнэр эргиллэн кэлбэтэллэр ханнык...”, – диир.
Чахчыта да оннук. Аҕыйах сыллааҕыта “Уһук Илин гектарынан” эмиэ мөлүйүөнүнэн киһини көһөрөн аҕалыах буолаахтаабыттара да... Уһук Илин нэһилиэнньэтэ билигин күүскэ көҕүрүү турар. Ким да онно күргүөмнээн көһөн кэлбитэ иһиллибэт.
