Жатайдааҕы судоверфь үлэҕэ киириитин 2022 сылга көһөрдүлэр. Төрүөтэ — тохсунньуга томороон тымныылар түһэннэр уонна хамсык хааччахтарынан тутуу хаамыыта бытаарбыт.
Судоверфь бастакы суудунаны быйыл ахсынньыга оҥорон түһэрэр былааннаах этэ, ону эмиэ биир сылынан сыҕарытан биэрдилэр. Бу туһунан Санкт-Петербурга ыытыллыбыт XVI TRANSTEC диэн Норуоттар икки ардыларынааҕы көлө көрүдүөрүн сайыннарар сугулааҥҥа өрөспүүбүлүкэ көлөҕө уонна суол хаһаайыстыбатыгар миниистирэ Владимир Сивцев эппит.
"2022 сыл ортотугар үлэҕэ киллэриэхпит диэн буолла. Тутуу хаамыытыгар быйыл тохсунньуга олус тымныы күннэр тураннар уонна хамсык хааччахтара оҕустулар. Ол иһин биһиги минпромторы кытары болдьоҕун сыҕарытан биэрэргэ сөбүлэспиппит. Бастакы суудунаны эһиил тутан түһэриэхпит", - диэбит министир. Билигин верфэ дьиэтин тутуу түмүктэнэн эрэр. Тымныылар түһүөхтэригэр дылы эбийиэк итиини тутарын курдук сүрүн үлэлэр оҥоһуллуохтара, ис инфраструктурата сүрүннээн бүппүт, канализацияны киллэрии эрэ хаалан турар.
Санатар буоллахха, Жатайдааҕы судоверфь "Хаҥалас" ТОРга киирсибитэ. Манна Өлүөнэ флотун өрөһүйүөхтээх суудуналар тутуллар, өрөмүөннэнэр буолуохтаахтар.
