Таатта улууһун Кыйытыгар "Үөрэхтээһин" национальнай бырайыак иитинэн 90 миэстэлээх саҥа таас оскуола тутулла турар.
Икки мэндиэмэннээх таас оскуола 2757 кв.м. иэннээх, билигин тутуу 90% ситэн турар. Тутааччылар ис бараанын ситэрэллэр, миэбэллэри уонна тэриллэри таҥан туруораллар.
Саҥа оскуолаҕа лабаратыарыйалар, мастарыскыайдар, остолобуой, медпуун, бибилэтиэкэ, успуорт уонна аактабай саалалар бааллар. Этээстэргэ анал рекреация уонна холл, санузел баар. Маны таһынан тэлгэһэҕэ успуорт былаһаакката, оҕо сынньанар уонна оонньуур сирэ баар. Эбийиэги бу сэтинньигэ туттарар былааннаахтар.
