Дьокуускай куоракка сокуоннайа суох арыгы атыытын кытта охсуһуу тохтообот. Строительнай уокурук дьаһалтата иһитиннэрэринэн, бүгүн «Лепрекон» маҕаһыын хаһаайынын кытта дуогабар көтүрүлүннэ.
Дьаһалта исписэлииһэ Олег Боппосов тиэрдэринэн: «Биһиги дуогабары биир өртүттэн көтүрбүппүт. Биир ый иһигэр маҕаһыын суох буолуохтаах. Кини биһиги дьаһалбытын толорботоҕуна, күүһүнэн көтүрэргэ тиийэбит. Онуоха Дьокуускай куорат дьаһалтата кытаанах миэрэлэри ылыаҕа».
Ону, таһынан маҕаһыын хаһаайына гааһыгар уонна уотугар иэс бөҕөҕө киирбит. Бу нэдиэлэҕэ барытын араарыахтаахтар. Бэҕэһээ, бэнидиэнньиккэ алтынньы 18 күнүгэр кини туох баар малын-салын хомунан, тутууну босхолообут.
Арыгыны сокуоннайа суох атыы иһин бастакынан, Чиряев аатынан уулуссаҕа турар «Флагман» маҕаһыын, үлэлиир бырааба быһынна. Урбаанньыт бу миэстэҕэ 2006 сылтан арыгынан эргиммит. Сокуоннайа суох итирдэр утаҕы атыылааһын иһин, маҕаһыыны кытары дуогабары көтүрүү, бу – Дьокуускай куоракка маҥнайгы түбэлтэ. Иккис күүстээх охсууну «Енисей» диэн Бырамыысылыннай уокурукка турар маҕаһыын ылла, түүннэри арыгы атыытыгар түбэһэн. Сокуону кэһэн туран арыгы атыылааччылары утары – киэҥ, күүстээх охсуһуу хампаанньата биллэрилиннэ! Күөх моҕойу уора-көстө атыылаан дьон-сэргэ олоҕун огдолутар түөкүттэри утары аһыммат, төрдүлэриттэн түөрэр быһаарыылаах сэрии биллэрилиннэ.
