Уус Алдаҥҥа ааспыт нэдиэлэҕэ улуус устуоруйатыгар биир бэлиэ күн буолла. Ол курдук, куйаар ситимин нөҥүө иһиллэр “Дуораан” онлайн-радио үлэтин саҕалыыр үөрүүлээх тэрээһинэ ыытылынна. Аата да этэринии, улуус сүрүн сонуннарын, талааннаах дьонун-сэргэтин ырыатын-тойугун, кэпсээнин-ипсээнин, ыраахха диэри дуораһытар радио номнуо күнү эргиччи үлэлээн саҕалаата.
Истээччилэр көрдөһүүлэринэн эҕэрдэлэр, биллэриилэр тиһигин быспакка тахсаллар. Устуудьуйаҕа ыалдьыттар кэлэн, улуус үлэтин-хамнаһын кэпсииллэр.
Радио “Өркөн” эбии үөрэхтээһин киининигэр биир сыл аннараа өттүгэр арыллыбыт “IT – киин” иһинэн үлэлиир. Маныаха “Дуораан” радионы мобильнай сыһыарыы быһыытынан плей-маркеттан олус кэбэҕэстик хачайдаан ылан, телефоҥҥуттан истэ сылдьыахха сөп.
Радионы тэрийии идиэйэтин көтөхпүт Иван Иванов кэллиэгэлэрин кытта биир санааҕа кэлэн, саҕалааһын уустуктарын ааһан, уопуттаах дьонтон сүбэлэттэрэн сыалларын ситистилэр. Саҥа үлэһит Юрий Стручков ди-джей быһыытынан киирэн, бары сатабылларын-билиилэрин ууран туран, истээччилэргэ анаан күннэтэ эпииргэ тахсаллар.
“Бастаан утаа радиобыт PlayMarket андроид платформатыгар таҕыста. Номнуо 1000-тан тахса киһи бу сыһыарыынан радионы истэ сылдьара бэлиэтэнэр. "Ватсап" ситим нөҥүө истээччини кытта кэпсэтии, биллэрии, эҕэрдэ бэрсии барар. Оттон сотору кэминэн AppStore айфоҥҥа тахсара былааннанар”, - диэн “IT – киин” дириэктэрэ Яков Колодезников иһитиннэрдэ.
Бэлиэтээн эттэххэ, 2002 сыллаахха суруналыыс Павел Пермяков салалтатынан “Дуораан” диэн ааттанан улуус радиота 5 сыл устата үлэлээбитэ. Үгүс ыччат ылсан, дьон билиниитин ылбыттара. Онон бастакы радио тэриллибитэ 20 сылын көрсө "Дуораан" радио саҥа тыыннанан үлэтин саҕалаабытын дьон-сэргэ үөрэ көрүстэ.
Ылыллыбыт сигэтэ: https://xn--80aahjj1a2au6hb.xn--p1ai/article/33345