Бу күннэргэ Анаабырга тыа хаһаайыстыбатын эйгэтигэр үөрүүлээх сэргэх сонуну улуустааҕы тыа хаһаайыстыбатын управлениетын начальнига Туйаара Виссарионовна Николаева билиһиннэрдэ.
- Биһиги Анаабырбытыттан быйыл «Эдэр табаһыт» бырагыраамаҕа үс хоһуун табаһыттарбыт кыттан сүүмэрдээһини ааһаннар, дьиэ-уот туттуутугар эбэтэр дьиэ ылыытыгар 1 мөлүйүөннээх социальнай төлөбүрү ыларга хапсаннар, маныаха анал бирикээс тахсан, санаабыт өрө көтөҕүллэн олорор.
Кинилэр бары - Үрүҥ Хайаттан Үлэ Дьоруойа И.К. Спиридонов аатынан муниципальнай унитарнай тэрилтэ табаһыттара - 9 №-дээх ыстаадаттан Туприн Иван Андреевич, 1 №-дээх ыстаадаттан Туприн Михаил Владимирович, 3 №-дээхтэн Туприн Егор Никитич буолаллар.
2020 сылга киирбит Саха Республикатын тыатын хаһаайыстыбатын министиэристибэтэ хоту сирдэргэ ыарахан усулуобуйаҕа үлэлиир, тымныыга тоҥор-хатар, туундара тамайар табатын иитэр эдэр табаһыттары өйүүр “Эдэр табаһыт” бырагырааматын дьон-сэргэ биһирээн эрэр.
Бырагыраама чэрчитинэн бу субсидияны ипотекалаах буоллахтарына сабыахтарын сөп эбэтэр чааһынай дьиэ тутталларыгар тутуу матырыйаалын ыллахтарына, ол харчыта төлөнөр. Холобур, былырыын субсидияны эдэр табаһыппыт Геннадий Туприн ылбыта. Киниэхэ ИП Корякин Аркадий Михайловиһы кытта кэпсэтэммит тутуу матырыйаалын Үрүҥ Хайаҕа аҕалтарбыппыт. Геннадий быйыл сайын туттар былааннаах. Маннык курдук билиҥҥи табаһыттарбыт толкуйдаан тэриниэхтэрин сөп. Быйыл бу табаһыттары өйүүр субсидияны Булуҥ, Эдьигээн, Өлөөн, Муома, Өймөкөөн о.д.а. хотугу оройуоннартан барыта 20 эдэр киһи ылар буолбут. Биһиги докумуоннарын толорон ыытарбытыгар МУП кадр салаатын үлэһитэ Анастасия Николаевна хомуйан улахан көмөнү оҥорбута. Табаһыт бу салааҕа үлэлээбитэ 4 сыл ыстаастаах 35-гэр диэри саастаах, кэргэннээх буолуохтаах. Күрэҕи тыа хаһаайыстыбатын министиэристибэтэ ыытарын санатабыт.
Салгыы субсидия ылбыт эдэр табаһыт Иван Адреевич Туприн Үрүҥ Хайаттан үөрүүтүн үллэһиннэ.
- Биһиги ыал чааһынай бас билэр дьиэлэнээрибит көмө көрдөөбүппүт ыраатта. Былырыын бэйэбит анаан турбатахпыт, онтон быйыл докуменнарбытын биэрэммит хата көмө харчыга хапсыбыппытыттан олус үөрдүбүт.
Кэргэним Анна эмиэ чуум үлэһитэ, Красноярскай кыраай Сындааска бөһүөлэгэр билсэн сүгүннэрэн аҕалбытым. Билиҥҥи кэмҥэ 9 №-дээх ыстаадам эһиннэ, ол эбэтэр идэһэ буолар табалары уотан иитэр ыстаада этэ. Онон билигин уоппуска ыллыбыт. Дьонум удьуор табаһыттар, эдэр саастарыттан тыаҕа табаҕа сылдьыбыттара.
Сайын тутуу матырыйаалын ыллахпытына дьиэ туттар былааннаахпыт. Сирин учаастагын ылбыппыт. Уолаттар Михаиллаах, Егор иккиэн ыстаада биригэдьиирдэрэ тыаҕа сылдьаллар. Манна оскуолабытыгар тыа хаһаайыстыбатын Академиятыттан специалистар кэлэн үөрэппиттэригэр, табаһыт идэтигэр үөрэнэн корочка ылбытым.
Үлэлиир-хамсыыр совхозпыт дириэктэригэр Роман Дмитриевич Дмитриевка уонна улуустааҕы тыа хаһаайыстыбатын управлениетын начальнигар Туяра Виссарионовна Николаеваҕа улахан махтал. Биһиэхэ өрүү да кыһалҕаларбытын ыйытан көмөлөһө олороллор.Тыаҕа айылҕаҕа сылдьарбытын олус сөбүлүүбүт, бөһүөлэккэ өр сыттахха тыыммыт-хааммыт хаайтарар. Урукку кэмнэргэ тэҥнээтэххэ, улууспут салалтата усулуобуйабытын тэрийэллэр уонна маннык министиэристибэнэн эдэр табаһыттар өйөбүллээх буоллахпытына, биһиги да үлэбит тахсыылаах, санаабыт да күүстээх буолара чуолкай буоллаҕа...
Кэнники кэмнэргэ туундараҕа таба иитиитигэр эдэр ыччат бэйэтин баҕатынан үлэлии барара аҕыйаата, ол иһин маннык хоту дойду тыйыс усулуобуйатыгар күннэтэ үлэлиир-хамсыыр, төрүт салааҕа инники кирбиигэ сылдьар эдэр ыччаты өйүүр былырыын бигэргэммит “Эдэр табаһыт” бырагыраама үлэлиирэ туһаттан атыны аҕалыа суоҕар эрэллээхпит.
Бэйэлэрин чэрдээх илиилэринэн, хара көлөһүннэринэн үлэлээн-хамсаан өбүгэлэриттэн илдьэ кэлбит таба иитиитин сайыннаран киһи олоххо кэлбит аналынан эр дьоммут дьиэ-уот туттуохтара, олох дьолун толору билиэхтэрэ.
Ылыллыбыт сигэтэ: https://xn--80aaaaae5flrcuak4i.xn--p1ai/article/33489
