Ахсынньы 2 күнүгэр Дириҥ нэһилиэгэр бэлиэ түгэн буолла. Ол курдук, Чурапчы улууһугар нэһилиэнньэтин ахсаанынан иккис улахан бөһүөлэккэ – Дириҥҥэ гаас ситимэ тардылынна. Тэрээһиҥҥэ СӨ Ил Дархана Айсен Николаев, СӨ бырабыыталыстыбатын чилиэннэрэ уонна “Сахатранснефтегаз” АУо генеральнай дириэктэрэ Алексей Колодезников кытыннылар. Кинилэр күөх төлөнү бастакынан уматтылар.
Дириҥ нэһилиэгэр тутуу уонна таҥыы үлэтэ толору түмүктэннэ: биэс пусковой холбоһук, 480 гаас ситимэ (дьон олорор учаастактарыгар диэри) – барыта 34 км усталаах ситим тардылынна, олорор дьиэ 100 %-на хабылынна.
Маны таһынан, үөрүүлээҕэ диэн, нэһилиэк социальнай гаастааһын бырагырааматыгар киирбитэ. Ол чэрчитинэн, гааска бастакынан холбоммут 20-тэн тахса ыал ороскуота толуйуллуон сөп. Оттон тэлгэһэлэргэ диэри гаас ити бырагырааманан босхо тардыллар.
