Саха Өрөспүүбүлүкэтин хоруона хамсыгын утары охсуһар Суһал ыстаабын чахчыларын анаардахха, балаһыанньа этэҥҥэ буолара ыраах быһыылаах.
Оттон Мииринэй оройуона хоруона хамсыга тарҕаныытыгар, хомойуох иһин, инникилэр ахсааннарыгар сылдьар. Бу дьыл, сэтинньи 21 күнүттэн ахсынньы 9 күнүгэр диэри хоруона хамсыгынан 413 киһи киһи ыарыйда. Элбэх. Тоҕо чуолаан, сэтинньи 21 күнүттэн ааҕаҕын диэн токоолостоххутуна эппиэттиибин – бу иннинэ уоппускаҕа сылдьыбытым.
Хоруона хамсыгынан ыалдьыым содулун күүскэ эмтэнним. Сыл анараа өттүгэр, эмиэ уоппускам кэмигэр, хоруона хамсыгынан ыараханнык ыалдан хаалбытым. Тыҥам аҥаара сиэнэн, ковиднай госпитальга өлө-тиллэ, хараҥа-сырдык икки ардыгар «кулуннуу мөхсө» сыппытым. Онон, манна туох буоларын барытын билэбин.
Мииринэй ковиднай госпитала ыарыһахтарынан күн бүгүн тобус-толору. Миэстэ суох. Баара суоҕа 60 киһи киирэр стационарыгар сүүстэн тахса киһи симиллэр. Кыһалҕаттан, амбулаторнай ньыманан 400-500 киһи эмтэнэр.
Бу күһүҥҥэттэн ылата, Мииринэй ковиднай госпитала Анаабыр уонна Өлөөн улуустарын дьонун эмтиир. Ол диэкиттэн ыарахан туруктаах ыарыһахтары санавиация тиэйэр. Бу оннугар Бүлүү бөлөх улуустарыттан ыарыһахтары аҕалыы тохтотулунна. Бүлүү улуустарын балыыһаларыгар КТ(Көмпүүтэр томограба) тэриэбэтэ баар буоллаҕына, хотуларга ол суох эбит.
Мииринэй оройуоннааҕы балыыһата Саха сирин арҕаа эҥэрин бары улуустарын, ол иһигэр “Газпром”, “Роснефть”, “РНГ”, “ИНК”, “ИСТА” үлэһиттэрин, алмаас, ниэп, гаас хостооччулар бары бэдэрээччиттэрин эмтээн кэллэ. МЦРБ ноҕорууската сөҕүмэр.
Мииринэй эмчиттэрэ хамсык кэмигэр өрөбүлэ суох, сарсыарда хараҥаттан киэһэ хойуккуга диэри үлэлииллэр. Кинилэр үлэлэрин сиэрдээхтик сыаналыах тустаахпыт.
Станислав Алексеев. Мииринэй куората. МЦРБ саайтыттан фото.
