«Ааҕар Саха сирэ» бассаап бөлөх аатыттан Ньукулай Павлов-Халан (Бикипиэдьийэ), Валерий Луковцев-Дьурустаан (Айар), Анатолий Слепцов (суруйааччы, хирург), Виктор Борисов («Арассыыйа — Мин устуоруйам» түмэл), барыта 36 киһи 2021 сыл ахсынньы 6 күнүгэр ыҥырыы таһаарда.
Кинилэр куоракка олорор тыа дьоно төрөөбүт нэһилиэктэрин уонна оскуолаларын бибилэтиэкэтигэр сахалыы хаһыаттары, сурунааллары суруттарарга ыҥыраллар. Тыаҕа сорох дьон бибилэтиэкэҕэ баран ааҕаллар. Бу дьоммутугар, оскуола оҕолоругар сахалыы бэчээт тиийэригэр көмөлөһүөххэ дииллэр. Куоракка баар улуустар түмсүүлэрэ сурутууну көҕүлүөхтэрин сөп.
Сурутууну дьиэҕэр олорон электроннай ньыманан оҥоруохха сөп. Ол аата ханна да почтаҕа бара сатаабакка, дьиэҕэр эбэтэр үлэҕэр олорон көмпүүтэргиттэн эбэтэр төлөпүөҥҥүттэн сурутуоххун сөп. Бибилэтиэкэ аатын уонна аадырыһын билэргэ Бикипиэдьийэҕэ баар испииһэги көрүөххэ, эбэтэр улуус бибилиэтиэкэтин саайтыттан булуохха сөп.
Онлайн сурутуу: https://podpiska.pochta.ru/
Чэпчэтиилээх сурутуу ахсынньы 16 күнүгэр диэри буолар.
“Кыым” хаһыаты дьиэттэн тахсыбакка, почтаҕа барбакка, онлайн эмиэ сурутуохха сөп. 8-968 -150-67-15 нүөмэргэ эрийдэххинэ, эйиэхэ тута хайдах суруттараргын быһааран биэриэхтэрэ, бу нүөмэргэ моббаанынан ылаллар (тутааччы Захарова Диана Афанасьевна).
Онон сурут, сурутуу буолбутун дьоҥҥо кэпсээ.
2022 сыл бастакы аҥаарыгар суруппут дьоҥҥо бука барыларыгар ааҕа “КЫЫМ” хаһыат Иван Васильевы-Алгыс Уйбааны кытта кыттыһан оҥорбут күннээҕи олоххо (оҕо төрөөһүнүгэр, саҥа дьиэҕэ киириигэ, ыал буолууга, киһи өлүүтүгэр уо.д.а.) туттуллар алгыстара, сиэрдэрэ-туомнара кыра киниискэ быһыытынан оҥоһуллан тиийиэхтэрэ.
