РФ оборуонатын миниистирин солбуйааччы Тимур Иванов хамсыыр баай эбийиэктэрин тириэрдии туһунан докумуоҥҥа илии баттаабыт.
2021 сыл ыам ыйыгар, СӨ Ил Дархана Айсен Николаев Илин байыаннай уокурук сэриитин хамаандалааччы генерал-полковнигын Геннадий Жидколуун көрсүһүүтүн кэмигэр, Саха сиринээҕи кадетскай оскуола-интэринээт базатыгар баар «Авангард» киини сайыннарыыга тэрээһиннэр быһаарыллыбыттара.
Оҕолору уонна ыччаты үөрэтиигэ «Авангард» үөрэтэр-методическэй киин 28 тиэхиникэни ылыаҕа, мантан 16 - ракеталаах артиллерийскай сэбилэнии, 12 – бронетанковай сэбилэнии.
Бэриллибит тиэхиньикэ саҥа үүнэн эрэр көлүөнэ дойдуга бэриниилээх буоларын ситиһиигэ сорук буолуоҕа. Маны таһынан, «Авангард» киинин сиригэр баар «Патриот» өйдөбүнньүк аллеяҕа пааматынньык быһыытынан туруоҕа.
«Авангард» киин кадетскай оскуола эрэ оҕолорун буолбакка, бүтүн өрөспүүбүлүкэ үөрэнээччилэригэр аналлаах дьарыктары оҥорорго былаанныыр.
«Авангард» байыаннай, патриотическэй киин 2019 сылтан Саха сирин кадетскай оскуола-интэринээтигэр үлэлиир.
