Бүгүн Тааттабыт туонатыгар өссө биир үөрүүлээх күн тосхойдо. Ол курдук сабыс саҥа билиҥҥи ирдэбилгэ сөп түбэһэр Таатта оройуонугар Россия Ис дьыала Министиэристибэтин отделениетын административнай дьиэтин үөрүүлээх аһыллыыта буолла.
Сахалыы сиэринэн саҥа административнай дьиэ аһыллыытын сиэрин-туомун Таатта улууһун ыччат дьыалаларыгар уонна дьиэ кэргэн политикатын салайааччыта, СӨ оһуохай үтүөлээх этээччитэ Иван Иванов алгыс тылынан айхаллаан ситэрэн-хоторон толордо, аал уотун уматан, арыылаах саламаатынан, алаадьынан айах тутта, сылгы сиэлинэн сыт таһаарда уонна үөһээ үрдүк айыылартан саҥа дьиэ тулааһына туллаҥнаабатын, акылаата айгыраабатын диэн көрдөстө, алгыс сиэрин дорҕоонноох тойугунан түмүктээтэ.
Кыһыл лиэнтэни быһыы умнуллубат түгэнэ тигистэ: СӨ Ис дьыала миниистирэ генерал-майор Владимир Прокопенкоҕа, «Таатта» улууһа МО баһылыгар Михаил Соровка, Тааттатааҕы Ис дьыала начальнигын солбуйааччытыгар Александр Баснаевка.
Эҕэрдэ тылыгар Владимир Прокопенко Саҥа дьылы көрсө 1000 кв.м. иэннээх аныгы кэм ирдэбилигэр толору эппиэттиир тупсаҕай көстүүлээх саҥа административнай дьиэни аныыбыт диэтэ. Сотрудниктарга нэһилиэнньэни кытары Госуслуга нөҥүө күүскэ үлэлииллэригэр, нэһилиэнньэҕэ сэрэтэр профилактическай тэрээһиннэр систиэмэлээхтик баралларыгар ыйан туран саҥа дьиэ символическай күлүүһүн тылын уонна икки саҥа массыына күлүүһүн туттарда.
Саҥа дьиэ аанын астылар, баар дьону экскурсияҕа ыҥырдылар.
Ити курдук ахсынньы аам-даам тымныыта ааҥнаан турдаҕына, кыһыҥҥы Ньукуолун күн Ытык Күөл аныгы кэм ирдэбилигэр толору эппиэттиир тупсаҕай көстүүлээх саҥа дьиэ үлэҕэ киирдэ.
Елена Слепцова
