Уус Алдан улууһун киин сэлиэнньэтигэр Бороҕоҥҥо "Демография" национальнай бырайыак "Ийэлэр дьарыктаах буолууларын хааччыйыы – үстэригэр диэри саастаах оҕолору оскуола иннинээҕи үөрэхтээһининэн хабыыга усулуобуйаны тэрийии" эрэгийиэннээҕи бырагырааматын чэрчитинэн, 75 миэстэлээх "Кэскил" оҕо саадын саҥа дьиэтэ тутуллан, кырачаан иитиллээччилэригэр аанын арыйара бэрт аҕыйах кэм хаалла.
Бу туһунан сэбиэдиссэй Римма Черкашина бу курдук билиһиннэрдэ:
"Уопсайа 883,26 кв.м. иэннээх тутууну "Силим" ХЭТ тутуу хампаанньата ыытта. Бүгүҥҥү күҥҥэ дьиэбитин үлэҕэ киллэриигэ бэлэммит 99% диэххэ сөп. Миэбэл, оргтиэхиньикэ, оборудование барыта таҥыллан туран, сууйуу-сотуу, бэлэмнээһин үлэтэ ыытылла турар. Маныаха уһуйааммыт аныгы ирдэбиллэргэ толору хоруйдуур диэн бэлиэтиэх тустаахпын. Бэл пандус оннугар кэлээскэлээх оҕолорго анаан подъемник баар. Оттон кэбиниэттэргэ уонна саалаларга эмиэ сабыс-саҥа оборудование бөҕө кэлбитэ. Ол курдук, муусукаҕа дьарыктыыр уонна гимнастикалыыр саалаҕа магнитнай-маркернай дуоска, цифровой пианино, успуорт саалатыгар спортивнай муннук, шведскэй стенкэ, сүүрэр дорожка, велотренажер, батут, о.д.а. сонун уонна оҕону сайыннарыыга олус наадалаах тэриллэр хааччылыннылар.
Бу күннэргэ улуустааҕы кииннэммит бухгалтерияттан, бэйэбит тэрилтэбит үлэһиттэриттэн састааптаах анаан хамыыһыйа инвентаризацияны ыытыахтаах, ону кытта атын даҕаны ирдэнэр докумуон барыта оҥоһулла сылдьар.
Холобур, үөрэхтээһини ыытарга көҥүлү биэрэр лицензиябыт кэллэ. Үлэһиттэринэн толору хааччылынныбыт диэххэ сөп, өссө бу хаалбыт кэмҥэ эбии техперсонал ирдэнэрин булуохпут.
Онон, Саҥа дьыллааҕы өрөбүллэр кэннилэриттэн уһуйааммытыгар кырачааннарбытын күүтэбит. Оттон үөрүүлээх аһыллыы тэрээһинэ тохсунньу 14 күнүгэр былааннаммыта. Онно биир үөрүүлээх түгэни эмиэ сыһыаран, тэҥҥэ ыытыахпыт. Ол – уһуйааммыт устуоруйатын кинигэтэ улуус хаһыатын эрэдээксийэтигэр оҥоһуллан тахсыыта буолар".
Диана Седалищева
