"Чурапчы улууһун баһылыгын эбээһинэһин үрдүк чиэстээхтик, үтүө суобастаахтык толоруом. Улуус устаабын тутуһуом. Улуус олохтоохторун интэриэһин көмүскүөм, кинилэр бырааптарын убаастыам", - диэн саҥа анаммыт баһылык Степан Саргыдаев андаҕар тылын дьонун-сэргэтин иннигэр эттэ.
Баһылык дуоһунаһыгар киирии сиэрэ-туома "Айылгы" НАДь буолла.
Бааха Уус анаан оҥорбут түөскэ кэтэр мэҥэ бэлиэни Норуот хаһаайыстыбатын үтүөлээх үлэһитэ, Чурапчы улууһун Бочуоттаах гражданина Семен Иванович Сергеев кэтэттэ. Кини: "Төрөөбүт дойдуҥ туһугар таһаарыылаахтык үлэлээ-хамсаа", - диэн эттэ.
Степан Анатольевиһы эҕэрдэлии, ыраахтан-чугастан үгүс киһи муһунна. Олор истэригэр бу сылга диэри баһылыктаабыт Андрей Ноговицын, Ил Дархан дьаһалтатыттан Георгий Николаев, Дьиэ-уот хомунаалынай хаһаайыстыба уонна энергетикэ миниистирэ Вячеслав Емельянов, Ил Түмэн дьокутааттара Павел Пинигин, Михаил Гуляев, Семен Никитин, ыаллыы сытар улуустар баһылыктара, о.д.а. бааллар.
Кинилэр бэйэлэрин этиилэригэр Степан Анатольевич Бырабыыталыстыбаҕа үлэлээн буспутун-хаппытын, улуус баһылыгын дуоһунаһыгар сиппитин, салайар дьоҕурдааҕын бэлиэтээтилэр уонна киниэхэ улаханнык эрэнэллэрин биллэрдилэр. Улуус сайдыытыгар ылыммыт бырагыраамата барыта үлэҕэ киирэригэр баҕардылар.
Сэмэн Жендринскэй хаартыскаҕа түһэриитэ.
Елена Макаринская
Тарҕат:
