Ааспыт субуотаҕа, Нам улууһун Таастааҕар «Саха сүөһүтэ» хааһына генофонднай тэрилтэ саха сүөһүтэ турар 80 төбөҕө анаммыт иккис хотонун үөрүүлээх быһыыга-майгыга аста. "Саҥа хотоҥҥо эдэр сүөһүлэр тураллар", - диэн генофонднай тэрилтэ салайааччыта Александр Артемьев билиһиннэрдэ.
Саха сүөһүтүн элбэтэргэ, киэҥник тарҕатыыга туһуламмыт «О стратегических направлениях развития сельского хозяйства Республики Саха (Якутия)» диэн Ил Дархан Айсен Николаев ыйааҕынан хотон тутуллубут. Объегы «Навигатор+» ХЭУо 20 мөл. сууманы көрөн бэйэтин үбүнэн туппут, бу суума 2022 сылга тэрилтэҕэ толуйуллуохтаах.
Үөрүүлээх быһыыга-майгыга саха сиэринэн, хороҕор муостаахтар этэҥҥэ туралларыгар үрдүк айыылартан үҥэн-сүктэн, аал уоту оттон алгыс сиэрин-туомун Петр Охлопков толордо.
Бүгүҥҥү күҥҥэ генофонднай тэрилтэтин «Таастаах» отделениетыгар уопсайа 194 төбө саха сүөһүтэ баар, онтон 58-һа ыанар ынах. Отделение икки хотоҥҥо 11 үлэһиттээх, ол иһигэр ыанньыксыттар, сүөһү көрөөччүлэр, биригэдьиир, салайааччы уонна МЖП инженерэ бааллар.
Сүөһү энчирээбэккэ турарыгар туруулаһан үлэлээччилэргэ Андрей, Валерий Аргуновтарга, Афанасий Герасимовка, «Саха сүөһүтэ» хааһына генофонднай тэрилтэ сайдыытыгар быһаччы үлэлэһэр салайааччыларга, тутааччыларга СР тыатын хаһаайыстыбатын, Нам улууһун, Таастаах нэһилиэгин дьаһалтатын ааттарыттан махтал суруктары, бочуотунай грамоталары анал бэлиэлэри туттардылар. Тутааччы Павел Филиппов хотон үлэҕэ киирбит бэлиэтин — символическай күлүүһүн «Таастаах» отделениетын салайааччыта Александр Оконешниковка үөрүүлээх быһыыга-майгыга туттарда.
«Бүгүн 80 төбөҕө ыччат сүөһүгэ аналлаах хотоммутун астыбыт. Ааспыт сылга үлэҕэ киирбит хотоммутугар улахан сүөһүлэр, ынахтар тураллар. Ол хотон толору хааччыллыылаах уонна автоматизированнай оборудованиелаах. Манна уопсайа 11 буолан үлэлиибит. Үлэһиттэргэ анаан ааспыт сылга икки дьиэ тутуллан усулуобуйа тэриллибитэ. Тэрилтэбит инники үлэтэ, былаана киэҥ. Сайын сайылык күнүгэр Тураҥнаахха тэриллэн эрэр сайылыкпыт, научнай-чинчийэр кииммит аһыллыахтара», - диэн биригэдьиир Ольга Аргунова санаатын үллэһиннэ.
Бүгүҥҥү суолталаах тэрээһиҥҥэ СР государственнай мунньаҕын (Ил Түмэн) председателэ Алексей Еремеев, бастайааннай комитет кэккэ председателлэрэ, СР тыатын хаһаайыстыбатын министрэ Александр Атласов, «Нам улууһа» МТ баһылыга Юрий Слепцов уонна тэрилтэни кытта үлэлэһэр салайааччылар кыттыыны ыллылар.
Семен Аргунов
